Linjë ajrore Kosovë-Serbi, Rama përshëndet marrëveshjen dhe i hedh kunja Haradinajt: Mirë bëre që e pranove

Kryeministri Edi Rama ka reaguar për marrëveshjen e nënshkruar mes Serbisë dhe Kosovës që do të mundësojë fluturime midis Beogradit dhe Prishtinës.

Në një postim në “Twitter”, Rama përshëndeti marrëveshjen, duke e cilësuar atë si hap të rëndësishën, ndërsa nuk la pa shigjetuar edhe kryeministrin e Kosovës, Ramush Haradinaj.

“E përshëndes me kënaqësi marrëveshjen e sotme për fluturimet Prishtinë-Beograd, që siç tha Sekretari i NATO-s është “një hap i rëndësishëm  për qarkullimin më të lehtë të njerëzve e mallrave në Ballkanin Perëndimor” Ka ende shumë hapa për të bërë me vizion e kurajo në atë rrugë!

Shumë mirë bëri edhe Ramushi që e përshëndeti këtë hap. Paqja është tejet e vështirë, por në asnjë rast ajo nuk fitohet me mjetet e luftës dhe popullariteti i përkohshëm që sjellin nganjëherë ato mjete, nuk i sjell asnjë hajër popullit e vendit”, shkroi Edi Rama.

Marrëveshja u nënshkrua në ambasadën amerikane, ndërsa ambasadori amerikan në Berlin, Richard Gelle tregoi se ka qenë vetë presidenti Trump, i cili ka udhëhequr arritjen e kësaj fitoreje historike në afrimin e dy vendeve.