Liria e medias, HRW: Gazetarët përballen me mjedis armiqësor, nuk raportohet e vërteta

Organizata Jo-qeveritare e Vëzhguesve të të Drejtave të Njeriut (Human Rights Watch – HRW) ka përditësuar raportin për lirinë e medias në vendet e Ballkanit.

Në raport theksohet se qeveritë e vendeve të Ballkanit Perëndimor kanë dështuar në zgjidhjen e çështjeve që pengojnë lirinë e medias. “Gazetarët anembanë Ballkanit Perëndimor përballen me një mjedis armiqësor që i pengon ata të shfaqin aftësitë e tyre në përgatitjen e raportimeve kritike. Për më tepër, raste të tjera shqetësuese kanë dalë, çka flet për dështim të punës të qeverive në këto vende.”, shkruhet në raportin e HRW-së.

“Kjo situatë shqetësuese do të ndryshojë vetëm nëse Bashkimi Europian u bën të ditur qeverive të vendeve të Ballkanit Perëndimor se aspiratat e tyre europiane varen nga liria e medias.”, ka theksuar studiuesja Lydia Gall.

HRW përmend më tej rastin e muajit tetor, kur redaktori i Gazetës Express në Kosovë, ka marrë kërcënime me vdekje pas transmetimit të një dokumentari për krime lufte të kryera nga Ushtria Çlirimtare e Kosovës.

“Human Rights Watch” shkruan se Komisioni Europian ka shprehur shqetësimin për mungesën e lirisë së mediave në vendet e Ballkanit Perëndimor, konkretisht Komisioneri përgjegjës për Zgjerimin, Johannes Hahn, ka bërë referencë për lirinë e medias në rajon, në terma të përgjithshme, por nuk është detajuar mungesa e hetimeve efektive të qeverive të këtyre vendeve.

“Lista e presioneve dhe shkeljeve mbi mediat e pavarura në Ballkanin Perëndimor përbën një katalog pakënaqësish. Pa një media të pavarur është e vështirë për vendet e Ballkanit Perëndimor të përmbushin aspiratat e tyre.”, ka thënë më tej studiuesja Gall.

Raporti i referohet lirisë së medias në Ballkan, kryesisht në: Maqedoni, Mali i Zi, Bosnjë Herfcegovinë, Serbi, Kosovë.

Referuar lirisë së medias në Kosovë, HRW shkruan se janë regjistruar 14 raste të dhunës dhe kërcënimeve ndaj gazetarëve në 2015-ën, si dhe 8 raste të tjera gjatë gjysmës së parë të vitit 2016.

Ndër të tjera, përmendet gjithashtu rasti i një granate dore që shpërtheu më 22 gusht në afërsi të Radio Televizionit Publik të Kosovës, por që fatmirësisht nuk shkaktoi viktima.