Një ditë më parë, gjykata vendosi “arrest me burg” për Astrit Kotaj, ish-drejtorin e burgut të Durrësit, i cili akuzohet për lirimin e Lulzim Berishës. Mësohet se ky vendim nuk është vlerësuar si i drejtë nga Kotaj, i cili mohoi shkeljen e ligjit.
Bëhet e ditur se Astrit Kotaj, në dëshminë e tij përpara trupit gjykues, zbardhur nga gazeta “Panorama”, i faturoi gjithë përgjegjësinë juristit të burgut duke argumentuar se nuk është personi që merret me përllogaritjen e ditëve të dënimit.
“Mos më shikoni me keqardhje, pasi nuk kam shkelur asnjë ligj dhe jam i pafajshëm. Mund të më thoni, ku dhe pse e kam shkelur ligjin?! Kjo është një procedurë e juristit ligjor. Çdo dinamikë kontrollohet formalisht nga drejtori dhe për këtë ka raporte me zyrën juridike. Unë ricikloj dhe miratoj veprimtarinë e juristit. Personalisht nuk merrem me pjesën e dënimit të të burgosurve. Dua të di ku kam bërë falsifikim dhe ku kam shkelur unë detyrën? Unë nuk kam shkelur asnjë ligj. Nuk e ndiej veten fajtor dhe nuk dua të më shohin me keqardhje. Nuk ka asnjë provë reale që më implikon mua në këtë çështje”, deklaroi ish-drejtori i Burgut të Durrësit.
Mësohet se ai ka replikuar me gjyqtarin e çështjes dhe përfaqësuesen e organit të akuzës duke pretenduar pafajësinë e tij. Kotaj u arrestua për “shpërdorim detyre” dhe “falsifikim dokumentesh”, pas hetimit të nisur në lidhje me lirimin e të dënuarit.
Ishte Prokuroria ajo që kërkoi masën e sigurisë “arrest me burg” ndaj ish-drejtorit Kotaj pas dyshimeve se lirimi i të dënuarit është bërë nëpërmjet aplikimit të gabuar të amnistive të viteve të fundit, duke i konsideruar ato si dënim të kryer. (XH.A/SHUPLAKA)
Discussion about this post