Lirimi i punonjësit të bashkisë, reagon ashpër Policia e Shtetit: Ka tronditur të gjithë…

Policia e Shtetit ka reaguar ashpër lirimin (Lexo këtu) nga burgu të punonjësit të Bashkisë së Mallakastrës, Pëllumb Isufaj i cili u arrestua pasi dyshohej se ka goditur me gurë në kokë një punonjës të policisë, në protestën e zhvilluar para pak ditësh në Fier.

Në këtë reagim shkruhet se, lirimi i tij ka ka tronditur të gjithë Policinë e Shtetit.

“PSH do të ndërmarrë të gjitha masat ligjore si për të mbrojtur jetën e punonjësve të saj, ashtu dhe për të vënë përpara drejtësisë bashkëpunëtorët e krimit, edhe kur këta mbajnë të veshur padrejtësisht mantelin e gjyqtarit”, shkruhet në këtë reagim, duke argumentuar se ka prova të pakundërshtueshme se ka qenë Isufaj ai që e ka goditur efektivin e policisë

Deklarata e Policisë së Shtetit:

Vendimi i sotëm i gjyqtarit të Gjykatës së Shkallës së Parë Fier, Pirro Sota, për të liruar nëpunësin e Bashkisë Mallakastër, që goditi me gur në kokë një punonjës policie në krye të detyrës, ka tronditur të gjithë Policinë e Shtetit.

Arroganca, shpërfillja ekstreme e ligjit dhe injorimi flagrant i provave të pakundërshtueshme dhe i raporteve të shërbimit të Policisë së Shtetit, që provonin atë që ka parë tashmë gjithë Shqipëria, janë të papranueshme.

Punonjësit e Policisë së Shtetit kanë mbrojtjen e veçantë të ligjit, gjatë ushtrimit të detyrës së tyre.

Rreziku për jetën e punonjësve të PSH, shtohet jo vetëm nga papërgjegjshmëria e elementëve kriminalë, por edhe e gjyqtarëve të lidhur me krimin.

Policia e Shtetit e ka dëshmuar me gjakun e qindra dëshmorëve, përgjegjësinë e saj publike dhe nuk mund të pajtohet me vendime skandaloze të ndonjë gjyqtari të papërgjegjshëm, vendime të cilat jo rrallë herë kanë lënë të pandëshkuar jo vetëm autorët e plagosjeve ndaj policëve, si rasti aktual i Fierit, por edhe vrasësit e tyre.

PSH do të ndërmarrë të gjitha masat ligjore si për të mbrojtur jetën e punonjësve të saj, ashtu dhe për të vënë përpara drejtësisë bashkëpunëtorët e krimit, edhe kur këta mbajnë të veshur padrejtësisht mantelin e gjyqtarit.

Policia e Shtetit  do të depozitojë padi penale ndaj gjyqtarit Sota, si dhe do të referojë pranë organeve të Vettingut dokumentacionin që provon absurditetin e vendimit të tij.

Kujtojmë se Pëllumb Isufaj, personi i cili u arrestua pasi dyshohej se ka goditur me gurë në kokë një punonjës policie gjatë një protestë të organizuar nga dega e Partisë Demokratike në Fier (Lexo këtu), është liruar nga burgu duke ju dhënë masa “arrest shtëpi”.

(F.GJ/FAXWEB.AL)