Partia Demokratike reagoi për vendimin e Gjykatës së Krimeve të Rënda, e cila shpalli të pafajshëm Suel Çelën për përplasjen me policinë në Elbasan. Përmes një deklarate të shpërndarë për mediat, PD e cilësoi vendimin si në provë që tregon se drejtësia nuk është e lirë të ndëshkojë kriminelët.
“Shpallja i pafajshëm i banditit të rrezikshëm të Elbasanit Suel Çela, shërbëtor i pushtetit të Edi Ramës, provoi në mënyrë të përsëritur se me Edi Ramën në qeveri drejtësia nuk është e lirë të ndëshkojë krimin. Mesazhi që iu dha sot shqiptarëve është se kriminelët e pushtetit, ata që blejnë vota për karrigen e Edi Ramës janë të paprekshëm!”, thuhet në reagimin e PD.
Për demokratët, vendimi i lirimit të Suel Çelës fakton se drejtësia është në duart e kryeministrit Edi Rama. Në fund të deklaratës, PD sheh si emergjente ndarjen e politikës nga krimi dhe garantimin e zgjedhjeve të lira për vendin, ku krimi të mos ketë asnjë ndikim.
“Kur kriminelët vjedhin zgjedhjet për Edi Ramën, kur bëjnë drogë me lejen e pushtetit të Edi Ramës, kur godasin policinë dhe e çnderojnë atë me mbrojtjen e Edi Ramës, drejtësia është e pafuqishme të bëjë drejtësi. Duke shpallur të pafajshëm kriminelët e pushtetit, rrëzohet çdo iluzion për drejtësinë e pavarur. Të gjithë e kanë mësuar se drejtësia është plotësisht në dorën e Edi Ramës dhe të krimit. Vendi ka nevojë jetike për ndarjen e politikës nga krimi, ka nevojë për zgjedhje të lira, të pandikuara nga kriminelët, si dhe për një qeveri të re, që e ka fatin të lidhur me qytetarët dhe jo me kriminelët”, përfundon reagimi i Partisë Demokratike.
(M. I. Faxweb)
Discussion about this post