Shërbimet e Komisariatit të Policisë Nr. 1, në bashkëpunim me Policinë Bashkiake dhe Inspektoratin e Mbrojtjes së Territorit (IMT), kanë ndërmarrë një aksion për lirimin e hapësirave publike të zëna në mënyrë të paligjshme përreth stadiumit “Arena Kombëtare”.
Gjatë këtij operacioni u konstatua se trotuaret dhe vendkalimet për këmbësorë ishin zënë me tavolina, karrige dhe çadra, të vendosura nga 7 subjekte tregtare që operonin në zonë. Për këtë arsye, u proceduan penalisht në gjendje të lirë administratorët e këtyre bizneseve: A. S., N. R., Xh. B., M. S., K. M., L. L. dhe B. K., të cilët akuzohen për veprën penale “Pushtimi i tokës”.
Gjatë ndërhyrjes, një 40-vjeçar me inicialet F. P., i punësuar në njërin nga lokalet, kundërshtoi punonjësit e IMT-së, duke penguar kryerjen e detyrës. Edhe ndaj tij nisi procedimi penal në gjendje të lirë.
Në total, gjatë aksionit u sekuestruan rreth 330 objekte që shërbenin për aktivitetet ekonomike të zhvilluara në hapësirat publike pa autorizim.
Autoritetet bëjnë me dije se kontrollet dhe verifikimet në terren do të vijojnë edhe në ditët në vijim, me qëllim mbrojtjen e hapësirave publike dhe vënien përpara drejtësisë të çdo shkelësi të ligjit.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
