“Lista e zezë” e kryeministrit Rama me emra zyrtarësh në administratë që publikoi në rrjetet sociale si të korruptuar, denoncuar nga komentet në ‘’Facebook” ka pasur një reagim masiv.
Kjo për faktin e thjeshtë se zyra e kryeministrit përveç publikimit të listave si fletërrufetë në kohën e diktaturës, nuk dha asnjë fakt tjetër të vërtetuar për korruptimin e këtyre zyrtarëve.
Në listë u përfshinë dhe emra shumë të nderuar të mjekësisë si Mentor Petrela, apo gjyqtarë dhe prokurorë.
Nëse Rama bazohet vetëm në komentet, ndoshta dhe të njerëzve dashakeq në rrjetet sociale, atëherë personat e përmendur me të drejtë mund të ndihen të fyer.
Petrela ishte i pari që pranoi dje në disa reagime për mediat se me shumë gjasa me Ramën do të përballet në gjyq për shpifje. Po ashtu gjyqtarë të tjerë pritet që të reagojnë në lidhje me përfshirjen e tyre në listën e Ramës.
Po çfarë rrezikon kryeministri? Fyerja dhe shpifja në vendin tonë janë hequr nga Kodi Penal që prej vitit 2012 dhe tashmë nuk mund të dënohen me burg. Pavarësisht ndaj kujt është shkaktuar kjo vepër.
Prej 2012-tës me ndryshimet në ligj një person që fyen do të dënohet me gjobë që shkon nga 50 mijë lekë deri në 1 milion lekë dhe një person që shpif do dënohet po ashtu me gjobë nga 50 mijë lekë deri në 1.5 milionë lekë. Kështu që edhe në rast se dënohet për kryeministrin nuk do të jetë ndonjë kosto e lartë.
Ndoshta do të kishte bërë mirë që ta paraprinte këtë me një ndjesë ndaj personave të dëmtuar.
(E.K/SHUPLAKA)
