Ish-ministri i Drejtësisë Ylli Manjani, i ftuar në emisionin “Studio e Hapur” të gazetares Eni Vasili, ka komentuar listën e ashtuquajtur “të zezë” të 101 zyrtarëvë të publikuar nga kryeministri Edi Rama në Facebook.
Sipas Manjanit, lista është e papranueshme dhe anti-ligjore, madje shprehet se me linçimin e emrave të prokurorëve dhe gjyqtarëve shkatërrohet edhe ligji i vettingut.
“Deri tek komunikimi publik nuk ka asgjë të keqe. Detyra e kryeministrit është të vjelë debate me publikun për çështjen e sistemit, jo njerëzit. Tani ai thotë nuk është sistemi, por njerëzit dhe kjo është e papranueshme dhe antiligjore. Pjesa më e rëndësishme në këtë listë është linçimi i gjyqtarëve dhe prokurorëve, të cilët linçohen vetëm në sistemin diktatorial.
Vettingu nuk bëhet nga Parlamenti. Linçimi publik i gjyqtareve dhe prokurorëve nga Rama ka dy risqe. E para se ata mund të kërkojnë mbrojtje. Tjetra është se bashkë me këtë kategori që kërkojnë mbrojtje mund të përfitojë edhe një gjyqtar apo prokuror që në fakt duhet të iki. Ja pse shkatërrohet vettingu me linçimet publike”, është shprehur Ylli Manjani.
Kujtojmë se Manjani, edhe më herët është shprehur kundër listës së publikuar nga Rama, pasi e cilësonte si aktin e parë të diktaturës, apo edhe si kapitullim të Reformës në Drejtësi.
“Akti i parë i diktaturës.
Komiteti Qëndror i Rilindjes, me në krye shokun Edi Rama, shpalli sot dënimin për disa nënpunës të shtetit! Ndër ta edhe gjykatës e Prokurorë!
Reforma në drejtësi kapitulloi, së bashku me vetting-un! Askush nuk do ta besojë në pavarësinë e strukturës së vetting, pas këtij linçimi publik të emrave që bëri mrekullia kushtetuese e Shqipërisë!
Drejtësia popullore e popullit të Facebook tashmë është në veprim!
I mjeri ai që i bie taksirati të ketë të bëjë me këtë shtet që po ndërtohet!!!”, shkruante Manjani. (D.D/Shuplaka)
Discussion about this post