Kreu i Grupit Parlamentar të LSI-së Petrit Vasili e ka quajtur fletë rrufe dhe llogje pazari listën e publikuar nga Edi Rama me 30 gjyqtarë dhe prokurorë që sipas kryeministrit janë të paftë. Vasili i thekson Ramës se “ata që shpikën fletë-rrufetë në fakt bënin hekurudha dhe elektrifikonin vendin, thanin këneta, kurse ti kryeminister ecën nga asgjëja drejt hiçgjësë”.
“Shumë i lodhur ky kryeministri ynë, damlla i tëri, vetëm me llogje pazari e me fletë rrufe do e kalojë jetën ky, jo e tha jo s’e tha, bëj një gramë punë or kryeministër, se edhe ata që shpikën fletë-rrufetë në fakt bënin hekurudha dhe elektrifikonin vendin, thanin këneta etj. etj., kurse ky kuje kryeminister ecën nga asgjëja drejt hiçgjësë”, shprehet Vasili.
Sjellim në vëmendje që kryeministri Edi Rama vetëm një ditë më parë ka publikuar listën me emrat e 100 zyrtarëve që sipas tij, kanë abuzuar me detyrën në administratë. Kjo erdhi pas denoncimeve të qytetarëve në faqen e kryeministrit, në rubrikën “Eksperiencat negative”.
Ajo që vihet re në listën e postuar nga kryeministrii janë 30 emrat e gjyqtarëve dhe prokurorëve të cilët ai nuk e ka patur aspak problem t’i publikojë, pavarësisht se denoncimet kanë ardhur përmes komenteve në Facebook dhe nuk është bërë asnjë verifikim për të vërtetuar rastet.
“310 JO-ADMINISTRATË: Grup komentesh që nuk lidheshin as me administratën qendrore dhe as me atë vendore, por me sistemin e drejtësisë në masen 98% dhe pjesa tjetër me kushtet e punës në sektorin privat. Në akuzat e ngritura për sistemin e drejtësisë mbizotëronte masivisht problemi i tjetërsimit të pronës, zvarritjeve me vite i çështjeve apo dhe mos-ekzekutimi i vendimeve”, shkruan kryeministri për abuzimet në administratë.
(J.V/Shuplaka)
Discussion about this post