Lista Serbe në kundërshtim të ndërtimit të dy urave të reja mbi Lumin Ibër ka nisur peticion.
Iniciativa që sipas kryetarit të partisë serbe, Zllatan Elek, ka për qëllim “unifikimin e qytetarëve serbë në kundërshtim të një projekti në dëm të komunitetit”, do t’u dërgohet bashkësisë ndërkombëtare.
Të martën qytetarë të shumtë të komunitetit serbë kanë nënshkruar peticionin, por nuk kanë pranuar të flasin për arsyet pse janë kundër ndërtimit të urave të reja. E matanë Ibrit, shqiptarët e mirëpresin ndërtimin e urave të reja, megjithatë ka prej tyre që duan të hapet ura kryesore e Ibrit.
Gurthemeli i dy urave të reja u vendos më 1 korrik në prezencë të Kryeministrit në detyrë, Albin Kurtit, që tha se qëllimi kryesor është lidhja e Veriut dhe Jugut të Mitrovicës akoma më shumë. Urat pritet të ndërtohen në dy krahët e urës kryesore të Ibrit, njëra do të jetë e qasshme edhe për vetura e tjetra vetëm për këmbësorë.
Bashkimi Evropian ka kërkuar kujdes të shtuar përfshirje të komuniteteve të prekura. Të martën mbi urën e Lumit Ibër ka qëndruar edhe zëvendës sekretari i përgjithshëm për Evropën dhe Euroazinë i Kombeve të Bashkuara, Miroslav Jença. Ai ka biseduar edhe me pjesëtarët e KFOR-it që mbikëqyrin urën, por për arsyen e vizitës së tij nuk ka pranuar të flasë.
Ndërkohë, ura kryesore mbi lumin Ibër vazhdon të jetë e kalueshme vetëm për këmbësorë dhe qeveria e Kosovës thotë se nuk heq dorë nga përpjekja për hapjen e saj.
