“Lista Serbe” ka vendosur të “ngrijë” pjesëmarrjen e saj në institucionet qeveritare të Kosovës, qoftë në atë legjislativ dhe në atë ekzekutiv.
Në deklaratën e saj, kjo parti shprehet se autoriteti i kryeministrit serb është i padiskutueshëm dhe vetëm ai do të merret në konsideratë.
“Aleksandar Vucic është kryeministër i qeverisë tonë të vetme dhe autoriteti i tij, si për ne, ashtu edhe për të gjithë serbët në Kosovë, është i padiskutueshëm. Për këtë arsye, ne, deputetët e Listës Serbe në Kuvendin e institucioneve të përkohshme në Kosovë, shpallim se do të zbatojmë të gjitha vendimet e kryeministrit Vuçiç dhe do ta ngrijmë pjesëmarrjen në punën e Kuvendit dhe Qeverisë së Kosovës”, thuhet në komunikatën e Listës Serbe.
Në komunikatë bëhet gjithashtu me dije kërkesa e kryeministrit serb për tërheqjen nga detyra të ministres së Administrimit të Pushtetit Lokal, Mirjana Jevtic. (XH.A/SHUPLAKA)
