Më vonë se koha e parashikuar në marrëveshje, ditë të tëra negociatash dhe nuk u arrit që Partia Demokratike të mbërrinte në KQZ me një listë të plotë kandidatësh për deputetë në zgjedhjet e 25 Qershorit.
Në një kohë që e gjithë opozita u bashkuan në një logo, atë të Partisë Demokratike, nga 140 kandidatë deri dje në KQZ u paraqitën emrat e vetëm 94 kandidatëve. Ajo që bie në sy është qarku i Tiranës nga 37 deputetë që do të ketë, PD ka dorëzuar një listë vetëm me 18 kandidatë.
Kjo bie ndesh me kodin zgjedhor dhe për këtë arsye KQZ-ja i ka dhënë kohë demokratëve për ti rishikuar listat. Sot rreth orës 12:00 pritet mbledhja e Komsionit ku do të miratohen dhe ndryshimet në rast se do të ketë.
”Numri i kandidatëve në listën shumemërore të një partie të regjistruar si subjekt zgjedhor më vete apo numri i përgjithshëm i kandidatëve të një koalicioni nuk duhet të jetë më i vogël sesa numri i mandateve që do të zgjidhen në zonën zgjedhore përkatëse”, thuhet ndër të tjera në Kodin Zgjedhor.
KODI ZGJEDHOR
NENI 67
5. Emrat në listën e partisë paraqiten të renditura sipas rendit shifror, duke filluar nga numri një. Numri i kandidatëve në listën shumemërore të një partie të regjistruar si subjekt zgjedhor më vete apo numri i përgjithshëm i kandidatëve të një koalicioni nuk duhet të jetë më i vogël sesa numri i mandateve që do të zgjidhen në zonën zgjedhore përkatëse. Për një parti pjesëtare të koalicionit, numri i kandidatëve nuk mund të jetë më i vogël sesa gjysma e mandateve që zgjidhen në zonën zgjedhore përkatëse. Për listat shumemërore për këshillat e bashkisë zbatohet i njëjti rregull.
6. Për çdo zonë zgjedhore, të paktën tridhjetë për qind e listës shumemërore dhe një në tre emrat e parë të listës shumemërore duhet t’i përkasë secilës gjini. Subjekti paraqitës i listës deklaron vendet, sipas kuotës gjinore, me qëllim zbatimin e përjashtimit, sipas pikës 2 të nenit 164 të këtij Kodi.
NENI 72
DOKUMENTET E KANDIDIMIT
1. Dokumentet e kandidimit duhet të jenë në përputhje me kërkesat e këtij Kodi dhe sipas formës së përcaktuar në udhëzimet e KQZ-së.
2. Dokumentet e kandidimit duhet të përmbajnë këto të dhëna:
a) listën e plotë të kandidatëve me renditjen përkatëse, të nënshkruar nga kryetari i partisë, ose propozimin nga komiteti nismëtar i një grupi zgjedhësish;
b) emrin, atësinë, mbiemrin, datëlindjen, gjininë, adresën e kandidatit dhe një kopje të dokumentit të identifikimit;
c) deklarimin e kandidatit se gëzon të drejtën dhe vullnetin për të kandiduar, në të cilin përfshihet, sipas rastit, deklarimi i dorëheqjes nga funksionet e përcaktuara në nenin 63 të këtij Kodi, shoqëruar me kopjen e deklaratës së dorëheqjes, të depozituar pranë institucionit përkatës;
ç) deklarimin e kandidatit të propozuar nga një grup zgjedhësish se nuk do të mbështetet apo nuk do të mbështesë asnjë subjekt zgjedhor në zgjedhje;
d) një listë të nënshkruar nga zgjedhësit e zonës përkatëse (E.K/SHUPLAKA)
