Në mbledhjen e Kryesisë së PD-së, kreu demokrat Sali Berisha, ka deklaruar se sot do të marrin vendimmarrjen më të rëndësishme të këtyre katër viteve, atë të kandidaturave që kjo forcë politike do të paraqesë para elektoratit.
Berisha e ka cilësuar procesin në PD transparent, ndërsa e krahasoi me atë të PS, duke thënë se “ekipi Rama-Lubi Balluku po përcakton kandidaturat tërësisht në bashkëpunim me klanet e krimit në Shqipëri”
Berisha: Të nderuar anëtarë dhe anëtare të Kryesisë së PD-së! Sot kemi vendimmarrjen më të rëndësishme të këtij 4-vjeçari, në miratimin nga kjo Kryesi, të kandidaturave që PD do të paraqesë para elektoratit shqiptar, së bashku me koalicionin “Për Shqipërinë Madhështore”.
Ky është një moment jashtëzakonisht i rëndësishëm, meritë e madhe e anëtarësisë së PD-së, drejtuesve të saj në degët e PD dhe në qendër, deputetëve të saj dhe ajo çka mund tu them unë, se ky proces qëndron në lartësinë e plotë të objektivit kryesor të PD-së “Shqipëria Madhështore”.
Ky është procesi më transparent i zhvilluar ndonjëherë në historinë e PD-së, me pjesëmarrjen më të gjerë të mundshme, me përfaqësimin e të gjitha ndjesive, të gjitha shtresave, nënshtresave, grupeve, komuniteteve të shoqërisë shqiptare.
Por, këta kandidatë për deputetë kanë avantazhin sepse janë njëkohësisht përfaqësuesit e koalicionit më të rëndësishëm që ka njohur Shqipëria në 32 vite.
Ky koalicion që bashkon rreth 25 parti, të cilat përveç partisë pa PD, përfaqësojnë një të tretën e elektoratit shqiptar.
Dhe, kjo përbën një avantazh të fuqishëm për aleancën Shqipëria Madhështore dhe PD, një avantazh i cili ka goditur thellë në dëshpërim palën kundërshtare, që në fakt është në kaos të vërtetë.
Ekipi Rama-Lubi Balluku po përcakton kandidaturat tërësisht në bashkëpunim me klanet e krimit në Shqipëri.
