Mbrëmjen e sotme, kreu i opozitës Lulzim Basha është i ftuar në emisionin “Opinion” të gazetarit Blendi Fevziu, ku ka folur për negociatat e dështuara me kryeministrin Edi Rama.
Ndërkohë që ishte në transmetim të drejtpërdrejtë, Basha ka gjetur pak minuta kohë që të publikojë edhe në rrjetet sociale.
Pasi tha që ishte dakord me krijimin e një qeverie teknike, kërkesë e opozitës që prej 18 shkurtit kur nisën protestat, të njëjtën deklaratë ai e postoi edhe në Facebook gjatë kohës së pushimit.
“Jam i gatshëm që me një qeveri teknike, me një kryeministër teknik të propozuar nga Edi Rama, të miratojmë vetingun dhe të hymë në zgjedhje të lira dhe të ndershme.”, shkruan Basha.
Nëse nuk ka qenë kreu i opozitës ai që ka reaguar në Facebook, mesiguri kanë qenë këshilltarët e tij për Marrëdhëniet me Publikun, të cilët reagojnë në emër të tij.
Gjatë emisionit, i pyetur nga Fevziu për deklaratat e Ramës që e gjeti në një dhomë tjetër takimin e së martës, Basha shprehu se takimet ishin planifikuar të veçanta që në fillim ndryshe nga sa shprehet kryeministri.
“Edi Rama gënjen, unë e di ça ka thënë por gënjen, nuk kishte takim mes meje dhe Ramës, është informuar Rama që në fillim se është thirrur në një takim të veçantë me Fleckenstein dhe Vlahutin , ndërsa unë isha thirrur në një takim të veçantë me McAllister. Ai ishte ndërmjetësuesi.
Takimet ishin të planifikuar të veçanta, i pari ka mbërritur Rama, unë kam shkuar pas tij dhe jam futur në dhomën e takimit. Këto janë të gjitha mashtrime, nuk pati dakortësi sepse ishte Rama që nuk pranoi qeverinë teknike.”, deklaron Basha. (D.D/Shuplaka)
