Kryeprokurori Adriatik Llalla ka pasur një takim këtë mëngjes me Ministrin e Drejtësisë Petrit Vasili. Takimi ka qenë në kuadër të bashkëpunimit instituicional kundër trafikimit të lëndëve narkotike.
Në fjalën e tij Llalla u shpreh se ka një numër shumë të lartë të rasteve që ende nuk janë zbuluar, si dhe droga që sekuestrohet nuk zbatohet sipas ligjit.
“Një ndër problematikat kryesore dhe çështjet më sensitive është dhe lufta kundër krimit të organizuar. Gjatë kësaj periudhe vijon të jetë tepër shqetësuese fakti se në vend vijon të kultivohen dhe trafikohen sasi të mëdha lëndësh narkotike. Problem tepër shqetësues të cilin institucioni ynë, posaçërisht Prokuroria e Krimeve të Rënda, kanë qenë të angazhuara me të gjitha mjetet e tyre.
Është shqetësues fakti se nga strukturat e tjera ligjzbatuese, të cilat kanë për detyrë të kontrollojnë territorin dhe verifikojnë këto raste, ka një përqindje shumë të ulët të autorëve të këtyre veprave penale. Kemi kontakte të vazhdueshme me institucionet e tjera përgjegjëse, por gjithsesi rezultatet e zbulimit të autorëve të veprave penale mbeten tepër të ulëta”, theksoi ai.
Më tej ai ndahu dhe një qetësim tjetër evident për Prokurorinë. “Problematikë tjetër mbetet mënyra e administrimit të provave materiale. Posaçërisht në rastin e lëndëve narkotike. Në mënyrë të vazhdueshme bëjnë publike të dhëna se çdo ditë sekuestrohen sasi të konsiderueshme lëndësh narkotike, asgjësohen lëndë narkotike, ndërsa nga ana tjetër thuajse ka një mospërfshirje totale të prokurorëve në mënyrën sesi administrohen, sekuestrohet dhe asgjësohen këto lëndë narkotike.
Është detyrim ligjor i gjithsecilit prej nesh të verifikojë këto rastet, për të parë, verifikuar dhe vendosur para përgjegjësisë ligjore kur konstatohet se lënda narkotike dhe provat e tjera materiale asgjësohen në mënyrë jo të parashikuar nga ligji. Në të gjitha rastet, lënda narkotike ashtu si çdo provë tjetër do të asgjësohet në prani të Prokurorit. Ju rikërkoj që të gjitha rastet kur ka dyshime që provat materiale asgjëson në mënyrë të kundraligjshme të fillojnë hetimet nëse kjo lëndë narkotike apo çdo lëndë tjetër, provë materiale nuk asgjësohet ose administrohet në mënyrën e parashikuar në ligj të fillojnë hetimet dhe të vendosen para përgjegjësisë ligjore autorët”, tha Llalla.
Edhe më herët Llalla e ka ngritur shqetësimin e tij për mangësinë e bashkëpunimit mes policisë dhe prokurorisë në aspektin e luftimit të lëndëve narkotike.
Edhe ministri Vasili gjatë fjalës së tij e vendosi theksin te bashkëpunimi ndërinstitucional në mënyrë që të gjitha fenomenet që kanë të bëjnë me krimin të luftohen.
(E.K/SHUPLAKA)
Discussion about this post