Ministri i Brendshëm Sandër Lleshaj në fjalën e tij në Kuvendin e Shqipërisë foli sërish për ngjarjen e grabitjes në Rinas të milionave euro.
Pa u shprehur saktë për vendndodhjen e lekëve apo gjurmimin e tyre ministri Lleshaj tha se Policia vijon me metoda shkencore hetimin për identifikimin e grupit grabitës. Ai solli një detaj të ri për grupin duke e lidhur atë me celulat terroriste të cilat sipas tij: “kanë krijuar probleme të mëdha në disa vende, në Shqipëri, Greqi, Kosovë, ka sulmuar banka, ka grabitur dhe ka lidhje me celula terroriste“.
Lleshaj gjithashtu ka folur dhe për sulmet e opozitës të cilat sipas tij po sulmojnë policinë në ditët kur kjo e fundit po nxjerr në dritë të dhëna të rëndësishme për ngjarjen që tronditi jo vetëm Shqipërinë.
“Po bëhen sulme nga një person, që unë në shenjë proporcioni sepse edhe ai ka hequr dorë nga adresimi me emrin e vërtetë, unë i them Haxhi Mileti, të gjithë e dinë kush është”, tha Lleshaj duke nënkuptuar ish-kryeministrin Sali Berisha.
Ai gjithashtu foli edhe axhendën e opozitës, që sipas Lleshajt kërkon të zbehë arritjet në reformën në drejtësi.
“Reforma në drejtësi nuk gjen mbështetje nga segmente të caktuara nga politika, që krijon një mjedis skizofrenik për të relativizuar, zbehur, fjalën “reformë në drejtësi” nga diskursi publik. Jemi dëshmitarë që krijohen axhenda paralele ku vetëm fjala reformë në drejtësi nuk përmendet, janë gati të vënë zjarr kudo por askund nuk flitet për reformën në drejtësi. Sot pati një grup të vogël të rinjsh para Parlamentit, që në përpjekjen për të qenë “inovativ”, kishin vënë një banderolë të turpshme, “Ti Shqipëri s’më jep nder”. Gjë e turpshme, nga një grupim i caktuar politik që krijon dëm në përpjekjet për të mbijetuar në kushtet e një reforme që e bën të vështirë mbijetesën e atyre që kanë borxhe të mëdha me drejtësinë. Shenjë e dëshpërimit është edhe sulmi ndaj Policisë së Shtetit, jo vetëm fizike, por edhe verbale”, tha Lleshaj
Discussion about this post