Izraeli është duke përjetuar një nga zjarret më shkatërruese në historinë e tij, që ka shpërthyer mëngjesin e së mërkurës pranë Mesilat Zion, jashtë Jeruzalemit.
Shërbimi meteorologjik izraelit ka paralajmëruar se kushtet e rënda atmosferike që kanë përfshirë pjesën më të madhe të vendit mund të vazhdojnë, ndërsa zjarret përfshijnë Jerusalemin dhe Izraelin qendror. Kombinimi i erërave të forta, temperaturave jashtëzakonisht të larta dhe lagështisë së ulët në vend po rrit rrezikun dhe përhapjen e zjarreve.
Komandanti i shërbimit të zjarrfikësve dhe shpëtimit në rajonin e Jerusalemit ka deklaruar se këto mund të jenë zjarret më të mëdha në historinë e Izraelit dhe se zjarrfikësit kanë ende shumë punë përpara se të mund ta vendosin zjarrin nën kontroll.
“Ne jemi në mes të një zjarri shumë të madh, ndoshta më të madhit që ka ndodhur ndonjëherë në këtë vend”, tha Shmulik Friedman gjatë një konference për shtyp të mbajtur sonte. Ai shtoi gjithashtu se janë ende shumë larg kontrollit të kësaj situate.
Zjarri ka shkaktuar edhe të plagosur, përfshirë dy foshnja dhe dy gra shtatzëna, ndërkohë që 13 persona janë dërguar në spital për shkak të thithjes së tymit dhe djegieve. Dhjetë persona të tjerë morën ndihmë mjekësore në vendngjarje, ndërsa shërbimi i urgjencës ka evakuuar persona të moshuar dhe pacientë të pafuqishëm me autoambulanca dhe njësi intensive të lëvizshme.
