Ish-presidenti Bujar Nishani ka reaguar pas publikimit të BIRN ku është denoncuar lobimi në Francë për të coptuar Kosovën. Me një postim në Facebook Nishani shprehet se tradhëtia nuk fshihet, sapo të përpiqet tradhëtari.
“Pas publikimit të BIRN dhe medias së pavarur në Kosovë, ku denoncohet lobimi në Francë, për të copëtuar Kosovën, besoj se është e qartë arsyeja e turravrapit të Gangsterrit të Shqipërisë me çarter privat në Paris!
Tradhëtia nuk duhet bërë, paskëtaj edhe “sikur të fluturosh”, nuk e mbulon dot! Tradhëtia nuk fshihet, sado të përpiqet tradhëtari, ajo gjithmonë del mbi ujë, se është tapë e kalbur !”shprehet ish- presidenti në postim.
BIRN ka zbuluar prova për përfshirjen e Presidentit Hashim Thaçi dhe Ambasadorit Kosovar në Francë, Qëndrim Gashi në lobimin për shkëmbimin e territoreve Serbi – Kosovë. Akademiku amerikan David Phillips dhe Korrespondenti për Europën Qëndrore i Le Monde, Jean-Baptiste Chastand kanë dëshmuar se Presidenti Hashim Thaçi u ka kërkuar të shkruajnë pro shkëmbimit të territoreve Serbi – Kosovë.
Phillips, drejtor i programit për paqe dhe drejtësi në Institutin e Studimeve të të Drejtave të Njeriut në Universitetin e Columbia-s, ishte këshilltar i Ministrisë e Punëve të Jashtme në vitin 2018.
Asokohe Thaçi i ka kërkuar të shkruante një dokument për të mbështetur shkëmbimin e territoreve mes Kosovës dhe Serbisë. Phillips refuzoi. Thaçi e quajti të korruptuar.
Ndërkohë në Francë, Ambasadori Qëndrim Gashi i kërkon gazetarit Jean-Baptiste Chastand të shkruajë një artikull se shkëmbimi i territoreve është një ide e mirë për të sjellë paqen. Dy javë më parë presidenti Thaçi i më kishte thënë të njëjtën gjë. – tregon Chastand.
Në takim ishte edhe një përfaqësuese e firmës franceze për marrëdhëniet me publikun ‘Majorelle’ – të kontraktuar nga Ministria e Integrimit Europian për të lobuar pro shkëmbimit të territorieve.
I pyetur nga BIRN për këtë, Gashi nuk e mohoi, por refuzoi të përgjigjej. Ai është zgjedhur Ambasador nga koalicioni PDK-LDK në 2016-ën kur Thaçi ishte ministër i jashtëm.
