Edhe pse nuk bëri aq zhurmë sa ndërprerja e takimit Itali-Shqipëri, ndeshja e luajtur në “Loro Boriçi” mes Kosovës dhe Islandës nuk kaloi aspak pa probleme.
Pak minuta para takimit, grupimi që mbështet përfaqësuesen e Kosovës, “Dardanët”, tentuan të fusnin brenda stadiumit një banderolë me mbishkrimin “Kosovo is Kosovo”, por kjo gjë u ndalua nga organizatorët e ndeshjes në “Loro Boriçi”.
Kaq duhej për të shkaktuar një lumë reagimesh.
Grupime të ndryshme të Kosovës e cilësuan si të papranueshme atë çka këta tifozë tentuan të bënin. Shumë prej tyre u distancuan duke theksuar se për ata ekzistonte vetëm një banderolë, “Kosovo is Albania”.
Pa u ftohur situata, sulmuesi i përfaqësuese së Kosovës dhe njëkohësisht lojtar i Manchester City, Bersant Celina, ka shpërndarë pak çaste më parë në rrjetet sociale banderolën e cila u ndalua të futej në “Loro Boriçi”.
Përfaqësuesja e Kosovës ka zhvilluar një ndeshje të madhe ndaj Islandës, por nuk i ka prirë fati, pasi ka humbur në fund me rezultat 2-1.
Kosova ishte kërkuese gjatë gjithë pjesës së parë, por nuk kishte fat për të gjetur golin, teksa pranoi edhe dy gola.
Fillimisht ishte Bjorn Sigurdarson, i cili kaloi në epërsi Islandën në minutën e 25, ku shënoi nga afërsia pas një topi të kthyer nga portieri Samir Ujkani.
Goli i 2-0 erdhi nga penalltia, ku i saktë ishte Gylfi Sigurdsson, i cili dërgoi kombëtaren e tij në pushim me epërsi të dyfishtë.
Në pjesën e dytë, Kosova hyri edhe më agresive dhe kërkuese duke mos e pranuar me asnjë mënyrë humbjen.
Kështu, Kosova gjeti shpejt golin e parë në këtë takim, ku ishte sulmuesi shtatlartë, Atdhe Nuhiu, i cili debutoi me gol.
Nuhiu shënoi një gol të bukur me kokë në minutën e 53 pas asistimit milimetrik të Herolind Shalës.
Në vazhdim të ndeshjes, Kosova provoi edhe disa herë të gjej golin e barazimit, por pa pasur sukses, dhe kështu humbën me rezultat 2-1 një ndeshje të luajtur shumë mirë dhe të luftuar deri në fund.
Pas kësaj humbje, Kosova vazhdon të jetë në vendin e fundit të Grupit I me vetëm një pikë, ndërsa Islanda renditet e dyta me 10 pikë.
(M.D/ Shuplaka)
