KAS ka vendosur që të hapë një kuti votimi në Mallakastër pas kërkesës së PDIU-së.
Rinumërimi i votave për anëtarët e Këshillit Bashkiak në Mallakastër ka ndryshuar shpërndarjen e mandateve. Rinumërimi i votave u kërkua nga Partia për Drejtësi, Integrim dhe Unitet drejtuar Komisionit të Ankimeve dhe Sanksioneve, për qendrën e votimit me numër 3239/00, e cila i përket njësisë administrative Greshicë.
Në procesverbal, 63 votat e PDIU-së i kishin kaluar Partisë Socialiste, e cila në këtë qendër votimi ishte votuar nga 97 zgjedhës. Ndërkohë, rinumërimi i ka hequr mandatin e këshilltarit kandidatit të koalicionit “Bashkë Fitojmë” Baftjar Bakiut, ndërsa PDIU ka siguruar dy vende në këshillin bashkiak pas rihapjes së kutisë.
Mandatin e këshilltares nga Partia për Drejtësi, Integrim dhe Unitet e ka fituar Giola Kelment Lutaj. Këshilli Bashkiak Mallakastër ka 21 vende, ndërsa Partia Socialiste ka fituar më shumë nga të gjithë, nëntë këshilltarë. Zgjedhjet vendore të 14 majit për kryetar të Bashkisë Mallakastër i fitoi kandidati socialist Qerim Ismailaj me 6080 vota, i cili u favorizua edhe nga përçarja e demokratëve.
