Shqipëria u godit orët e para të mëngjesit të së martës nga një tërmet apokaliptik me magnitudë 6.4, i cili shkaktoi vdekjen e të paktën 24 personave dhe la të plagosur mbi 600 të tjerë.
Më kritike situata u paraqit në Durrës e Thumanë, ku një numër i konsiderueshëm njerëzish u zunë poshtë nën rrënoja, shumica prej të cilëve u nxorrën të pajetë nga forcat e shpëtimit.
Të parët që janë solidarizuar me të prekurit nga tërmeti shkatërrimtar kanë qenë shqiptarët e Kosovës, të cilët jo vetëm që hapën dyert e shtëpive dhe banesave për të mirëpritur vëllezërit dhe motrat e tyre, por u dyndën drejt vendit tonë për të sjellë ndihma ushqimore dhe jo vetëm.
Një zonjë nga Peja, e cila vuante nga kanceri, ka emocionuar jo pak teksa ka telefonuar në një emision televiziv në Kosovë, ku po flitej për tërmetin që gjunjëzoi Shqipërinë.
Mes lotëve, Gjyljeta u shpreh:
”Unë jam e sëmurë nga kanceri. Dëshiroj t’i dhuroj 50 euro.”
Këto fjalë të saj dhe ky gjest human kanë prekur të pranishmit në studion televizive, të cilët shpërthyen në lot.
Discussion about this post