Lëvizja Rinore për Integrim organizoi sot një bashkëbisedim të hapur me maturantët, të cilët diskutuan dhe dhanë sugjerime mbi maturën shtetërore.
“Një shans për maturantët”, kjo ishte tema e takimit ku morën pjesë gjithashtu zëvendësministrja e Arsimit dhe Sportit, Nora Malaj edhe Kryetarja e LRI-së, Floida Kërpaçi, deputetja e LSI-së, Kejdi Mehmetaj
Në takim ishte i pranishëm edhe zëvendësrektori i Universitetit të Tiranës, Shezai Rrokaj, i cili u shpreh kritik ndaj ligjit të arsimit, i cili sipas tij shfaqi shumë probleme vitin e kaluar.
“Nxënësit tanë janë kthyer në kavje eksperimentale të paditurisë së atyre që qeverisin për të gjetur sisteme të thjeshta. Jam shumë i prekur nga një kalvar që fillon që në janar dhe që mezi përfundon në dhjetor e për çfarë? Për t’u futur në shkollë. Ky është një problem jashtëzakonisht i madh. Filloi Matura Shtetërore dhe në të u përfshi edhe pranimi në universitet, që nuk kishte pse të ngatërrohej. LSI ka qenë kritike ndaj ligjit dhe thamë se do të ishim shumë të vëmendshëm gjatë zbatimit të tij. Ajo që ne dyshonim dhe që e kishim thënë, rezultoi defektoze vitin që shkoi”, tha Rrokaj.
Megjithatë, zëvendësministrja e Arsimit dhe Sportit, Nora Malaj, tha se do t’i merrte parasysh të gjitha kërkesat, dhe do ia paraqiste Komitetit të Maturës Shtetërore.
“Të gjithë kërkesat që ju keni sjellë ashtu si edhe kërkesat e tjera të maturantëve që kanë ardhur nëpërmjet tryezave që ne kemi bërë me të gjitha grupet e interesit gjatë gjithë kësaj kohe, do t’i paraqes Komitetit të Maturës Shtetërore për t’ia bërë me dije dhe për ta vënë në udhëzim. Dhe jo vetëm në udhëzim, por për të bërë rast pas rasti zgjidhjen e çdo problemi në mënyrë që çdo maturant të ketë një shans, çdo shans të jetë i merituar, çdo meritë të ketë meritokraci dhe çdo vlerësim të shkojë në dijen e kapitaleve tona.”, u shpreh Malaj.
Ndërkohë, Kërpaci u garantoi maturantëve, të drejta të barabarta dhe standarte më të larta për maturën e këtij viti.
“Dua të shpreh vullnetin e plotë të LRI-së dhe LSI-së për të ndjekur së bashku adresimin e këtyre temave që diskutuam. Ne do të hartojmë një rezolutë që do ta dorëzojmë në Ministrinë e Arsimit e Sportit dhe do të këmbëngulim që Matura Shtetërore këtë vit të realizohet me standarde më të mira sa më të larta dhe të ofrojë një shans për të gjithë ne që jemi këtu, por edhe për maturantët anembanë Shqipërisë. Dua ta mbyll fjalën me garancinë time të plotë që ne do të luftojmë për një sistem arsimor që ofron shanse të barabarta për të gjithë maturantët. Në këtë rrugëtim ne do të vazhdojmë me bindje të plotë dhe do të luftojmë akoma më shumë për të rritur përgjegjshmërinë tonë por edhe për të kërkuar më shumë që të gjithë maturantët të gjithë nxënësit të kenë më shumë shanse dhe më shumë mundësi”, tha Kërpaçi.
Ndërkohë, Mehmetaj vlerësoi angazhimin e të rinjve në politikë si një mënyrë për të ndryshuar diçka në komunitet.
“Të gjithë gjimnazistët e LSI-së dhe LRI-së nuk kërkojnë që të kenë një angazhim publik për të përfituar në interesin e tyre të vogël e personal, por e bëjnë këtë për të ndryshuar diçka të mirë për komunitetin dhe për të gjithë bashkëmoshatarët e tyre. Kjo tregon që çdo ditë e më shumë nevoja e angazhimit të të rinjve në politikë është e padiskutuar dhe shumë e nevojshme. Çështjet e ngritura nga ju sot t’i ngremë në të gjitha nivelet, edhe në Parlament, qoftë nëpërmjet interpelance, apo qoftë edhe nëpërmjet një komunikimi të drejtpërdrejtë si institucion i Parlamentit me Ministrinë. Për ne është e rëndësishme që maturantët të mos kalojnë kalvare vuajtjesh apo ankthi, por që jeta e tyre të jetë e sigurt dhe e zgjidhur atje ku ju dëshironi, por edhe ku e meritoni të shkoni e që i gjithë ky proces të jetë transparent”, tha Mehmetaj. (D.D/Shuplaka)
Discussion about this post