Ish-këshilltare e LSI-së në Bashkinë e Tiranës Genta Mezini, ka reaguar pas shkarkimit. Ish-këshilltarja e cila një ditë më parë votoi pro rritjes së çmimit të ujit të pijshëm, shprehet se vota e saj tani e tutje do të shkojë për PS-në.
“Duke u nisur nga akuzat e dëshpëruara të LSI për blerjen e votës sime, dhe duke qenë se unë zgjedh progresin dhe jo regresin, zgjedh zhvillimin dhe jo prapambetjen, zgjedh shëndetin dhe jo sëmundjen, e shoh se nuk mund të jem me pjese e formatit politik te LSI. Qe nga ky moment , vota ime do te jetë pjesë e grupit politik te Partisë Socialiste.”, shkruan Mezini.
Mezini thotë se vota pro ishte për rindërtimin e Ujësjellësit, ndërsa deklaratave se ka shitur votën ajo u përgjigjet se nuk është e vërtetë.
Mbledhja e djeshme ishte mbledhja e parë e Mezinit në Këshillin Bashkiak të Tiranës, pasi u paraqit në vend të Floida Kërpaçit e cila u zgjodh deputete në zgjedhjet e 25 qershorit.
REAGIMI I MEZINIT
Falënderoj të gjithë qytetaret e njësisë 10 të cilët me votën e tyre në vitin 2015, me dhanë mundësinë të jem pjesë e Këshillit Bashkiak të Tiranës. Falënderoj të gjithë dashamirësit dhe ata që më kanë përgëzuar për aktin e djeshëm, ku unë votova bindshëm, krejt e lirë dhe e pavarur prej imponimit politik, votova për një projekt kaq ambicioz, që lidhet me furnizimin me ujë të kryeqytetit për 24 orë.
Jo vetëm si qytetare e Tiranës, por edhe si mjeke në profesion, unë jam e bindur që rindërtimi sipas standardeve të larta bashkëkohore të rrjetit të ujësjellësit, do të minimizojë ndjeshëm edhe sëmundjet infektive që vijnë si pasoje e kontaminimit të ujit nëpër depozita dhe cisterna krejt të amortizuara, siç janë parazitet e ndryshëm, viruset etj…
Për sa i përket deklaratave të bëra nga LSI për blerjen e votës sime, apo manipulimin e votës sime përkundrejt pazareve qe vetëm një dëshpërim i thellë mund ta sajojë, ju bej me dije që asgjë nuk është e vërtetë. Unë premtoj që votën time, në këshillin bashkiak te Tiranes do ta përdor vetëm në të mire të interesave të komunitetit. Jam e nderuar qe me jepet mundësia te kontribuoj përkrah kryetarit te Bashkisë z. Erion Veliaj dhe do bëj të pamundurën që të jap gjithë mundësitë e mia ne shërbim të qytetarëve. Duke u nisur nga akuzat e dëshpëruara të LSI për blerjen e votës sime, dhe duke qenë se unë zgjedh progresin dhe jo regresin, zgjedh zhvillimin dhe jo prapambetjen, zgjedh shëndetin dhe jo sëmundjen, e shoh se nuk mund të jem me pjese e formatit politik te LSI. Qe nga ky moment , vota ime do te jetë pjesë e grupit politik te Partisë Socialiste. (D.D/Shuplaka)
