Lëvizja Socialiste për Integrim ka organizuar një aktivitet festiv me nënat dhe gratë e njësisë nr. 11 në Tiranë. Aktivitet që kishte në qendër vlerësimin për ato që kujdesen për familjen, për komunitetin dhe për familjen e madhe të LSI-së.
E pranishme në këtë aktivitet ka qenë edhe kryetarja e Lëvizjes së Gruas për Integrim, Klajda Gjosha, që ka parashtruar programin që synon fuqizimin e tyre:
“Për gruan LSI ka një program të veçantë të cilin do ta ndajmë me ju. Një vëmendje të veçantë do t’i kushtohet grave kryefamiljare. Ky propozimi ynë është që ndihma ekonomike të jetë e dyfishuar. Propozimi tjetër është mbështetja për të gjitha ato gra dhe vajza të cilat duan të kenë një biznes të tyrin, pasi sot vetëm 15% e bizneseve drejtohen nga gra. Është problem tejet i madh pronësia apo marrja e kredive nga gratë dhe mundësitë që u jepen atyre. Unë jam e bindur se një grua në biznes do të ishte edhe më e zonja se burrat. Sepse në qoftë se nënat dhe gratë janë të suksesshme në familje, jam e bindur që edhe biznesi do të lulëzonte më shumë”, – u shpreh ndër të tjera Klajda Gjosha.
Ndërsa Sekretari i Përgjithshëm i LSI-së, Endrit Braimllari, theksoi rëndësinë e bashkëpunimit të politikës dhe konsensusit në mënyrë që qytetarët të marrin atë që meritojnë: më shumë mundësi punësimi dhe vende punë të mirëpaguara.
(XH.A/SHUPLAKA)
