Lëvizja Socialiste për Integrim ka prezantuar sot kandidatët për deputetë në Berat dhe Kuçovë. Në takimet e zhvilluara me anëtarësinë, kryetari i ri i LSI-së, bëri me dije se Lëvizja Socialiste për Integrim ka vetëm një objektiv, të dalë forcë e parë politike. Nuk është hera e parë që përfaqësuesit e LSI kanë shfaqur ambicien e tyre për fitore në këto zgjedhje të përgjithshme parlamentare.
Vasili u shpreh se për këtë, LSI ka përgjigjet e qarta nga njerëz të zotë, ka ndër të tjera shanset për rininë, punësimin dhe pensionistët.
“Kemi vetëm një objektiv dhe ky është të dalim forcë e parë politike. Jemi shumë të gatshëm dhe jemi të përgatitur që të qeverisim dhe i kemi të gjitha përgjigjet të qarta nga njerëz të zotë. Kemi një shans për rininë, kemi një shans për punësimin, por kemi një shans edhe për pensionistët.
Kemi një shans të ri edhe për bujqësinë, kemi një shans edhe për zhvillimin ekonomik të vendit. Pra, i kemi të gjitha përgjigjet e gatshme që si forcë e parë të jemi fitues”, – theksoi Kryetari i LSI-së, Petrit Vasili.
(XH.A/SHUPLAKA)
