LSI nderon Dritëro Agollin, anullon konventën zgjedhore në Tiranë në respekt të homazheve

Lëvizja Socialiste për Integrim anullon konventën zgjedhore në Tiranë, në nderim të homazheve për shkrimtarin e madh Dritëro Agolli.

Dritëro Agolli u nda nga jeta ditën e djeshme dhe homazhet për përcjelljen në banesën e fundit do të realizohen nesër nga ora 10:30 deri në 13:00.

”LSI do anullojë konventën zgjedhore të Tiranës të menduar në 5 Shkurt. Në respekt të patriarkut të kulturës sonë kombëtare”, thonë burimet për ”Shuplaka”-n.

Agolli ndërroi jetë në moshën 85-vjeçare pas krijimtarisë së gjerë në letrat shqipe. Për Agollin ditën e djeshme shprehu ngushëllimet e tij dhe kryetari i Parlamentit Ilir Meta.  

”Si Kryetar i Kuvendit, por edhe si mik i tij, dua t’i shpreh ngushëllimet e mia më të sinqerta familjes së Dritëroit, Sadijes, Elonës dhe Tanit, por edhe të gjithë të dashurve të tyre. Dua t’i shpreh ngushëllime gjithashtu të gjithë botës së letrave shqipe dhe të kulturës sonë për këtë humbje të pazëvendësueshme përgjithmonë. 

Dritëro Agolli ishte dhe do të mbetet figurë e rendit të parë në zhvillimin e mendimit shqiptar prej gjysmës së shekullit të kaluar, reformator historik i letërsisë shqipe, përfaqësues i zhvillimeve më të përparuara të kulturës shqiptare, reformator i jashtëzakonshëm edhe i politikës shqiptare me kontribut historik për proceset demokratizuese, burrë shqiptar me rrënjë të thella dhe me karakter të fortë dhe referencë e zhvillimit tonë shpirtëror. Njeriu që jetoi në kohët moderne me filozofinë naimiane të tretjes së qiriut për t’u ndritur mendjen të tjerëve. ‘Na dritërofsh gjithnjë Dritëroi ynë!’, dëshiroj të them në këto momente. Të prehet në paqe dhe në mirësi!”,u shpreh dje Kryetari i Kuvendit Meta.

(V.G/SHUPLAKA)