Kreu i Kuvendit, Ilir Meta ka komentuar kërkesat e opozitës në këto 2 muaj ngërç politik. Në daljen para gazetarëve, ai tha se pavarësisht mbështetjes që i ka dhënë PD-së, nuk mbështet çdo kërkesë të sajën, pasi në të kundërt do të ishte bashkë me të në çadër.
“Duhet ta mendoj që Shqipëria të ketë zgjedhje pa opozitën. Kam qenë i prirur që të kuptoj shqetësimet e tyre. Për dekriminalizimin kemi qenë shumë të qartë, jo për t’i dhënë të drejtë opozitës, por janë çështje që duhet ti godasim fortë që të rrisim besueshmërinë. Ndërsa unë nuk mund të them se opozita ka të drejtë në të gjitha kërkesa te saj, pasi nëse do ta mendoja këtë gjë do isha dhe unë në çadër. E mirëkuptoj shqetësimin e tyre. Do marr në konsideratë çdo rekomandim që Partia Popullore Europiane do bëjë për tejkalimin e ngërçit, por duhet të përgatitemi për pikat e takimit”, -tha Meta.
Meta po ashtu shtoi se është kërkuar ndihma për ndërmjetësimin e dialogut nga Partitë Popullore Europiane . Dialogu pritet të nisë nga java tjetër me ndërmjetësimin e europianëve.
“Kam kërkuar që PPE-ja të luajë një rol të rëndësishëm duke pasur në konsideratë mosvendosjen e dialogut, PD është pjesë e PPE , kanë luajtur një rol të rëndësishëm në të gjitha kohërat në Shqipëri dhe besojmë që ky rol lehtësues do të ketë një efekt pozitv , ne do të respektojmë cdo rekomandim të tyre për daljen nga kjo situatë. Dialogu fillon nga java tjetër”, u shpreh Meta.
“U bënë 3 javë për një artikulim të tillë për qeverinë e besimit, për fat të keq deklarata ime në vend që të rriste përpjektet për dialog u përkthye në një zhurmë. Asgjë nuk ka ndryshuar nga qëndrimi im. Askush nuk duhet të presë që LSi do të rreshtohet me këdo që do ta çojë këtë krizë në ekstrem, duhet të punojmë në këto ditë, çdo ditë që ikën e bën më të vështirë daljen nga kjo krizë”- tha Meta.
(M.D/ Shuplaka)
