LSI paditi KQZ-në për numëruesin e tretë, nis seanca në Kolegjin Zgjedhor

Ka nisur në Kolegjin Zgjedhor seanca mbi ankesën e Lëvizjes Socialiste për Integrim për numëruesin e tretë. Thirrja e kësaj seanca u bë me kërkesë të LSI-së që paditi Komisionin Qendror të Zgjedhjeve për ndarjen e numëruesit të tretë me PDIU-në.

Në seancën ku PD ka bërë kërkesë që të përfshihet si palë e interesuar, është i pranishëm edhe ish-ministri i Drejtësisë, Ylli Manjani.

Një ditë më parë u bë me dije se pjesë e trupës gjykuese të kryesuar nga Gjin Gjoni, që do të shqyrtonte ankimimin e LSI-së do të ishin Shkëlqim Mustafa, Tomor Skreli, Sotiraq Lubonja, Lindita Sinanaj.

Zhvillimi i seancës vjen pas pretendimeve të LSI-së se vendimi i KQZ-së ishte i njëanshëm, pasi cënon interesat e Lëvizjes Socialiste për Integrim, të cilës i takon të mos hidhet në short me një parti tjetër. Kujtojmë se shorti i hedhur një javë më parë në KQZ ndante mes PDIU-së dhe LSI-së antëtarin e tretë. 

(XH.A/SHUPLAKA)