Një ditë pas replikave të ashpra mes ambasadorit amerikan Donald Lu dhe kryeprokurorit Adriatik Llalla që u ndoqën me takime nga të dy zyrtarërt, ambasadori i SHBA-ve, Donald Lu, ka reaguar pak minuta më parë.
Në reagimin e tij të shkurtër, ai sigurin se SHBA-të kanë marrë një angazhim përballë popullit shqiptar për monitorimin e reformës në drejtësi dhe nuk frikësohen e as mund të pengohen nga përpjekjet e kundërta.
Lu siguron se do të vazhdojë angazhimi për të parandaluar manipulimin politik dhe korrupsionin në gjyqësor.
“Shtetet e Bashkuara kanë marrë një angazhim përpara popullit shqiptar për të monitoruar çdo hap të zbatimit të reformës në drejtësi. Asnjë përpjekje për të na frikësuar apo për të minuar procesin e reformës, nuk do të na pengojë që të sigurojmë që ajo do të jetë e suksesshme për të parandaluar manipulim politik dhe korrupsion në gjyqësor. Ky është një premtim. Ambasadori Donald Lu”, shprehet ambasadori Lu.
Ajo që vihet re në këtë reagim të shkurtër është se ambasadori i Shteteve të Bashkuara të Amerikës nuk i përgjigjet konkretisht asnjërës prej akuzave të rënda që Prokuroria e Përgjitshme bëri dje publikisht kundrejt tij, e që ishin cituar në letrën e Llallës drejtuar Kreut të Lartë të Shtetit, Bujar Nishani dhe atij të Kuvendit, Ilir Meta.
Ai nuk përgjigjet as për akuzat e kryeprokurit për presion për ndalimin e hetimeve ndaj kompanive me aktivitete të paligjshme dhe as për revokimin e vizave të disa zyrtarëve. (XH.A/SHUPLAKA)
Discussion about this post