Pas thirrjes së Luan Ramës, i cili kërkoi sot që PD dhe PS të bashkohen dhe të bëjnë reformën zgjedhore, ka reaguar nënkryetari i Grupit Parlamentar të PS-së, Taulant Balla.
Përmes një postimi në rrjetet sociale, deputeti socialist i kujton deputetit të LSI-së se, ai është pjesë e mazhorancës dhe se LSI dhe PS janë bashkë me qëndrime të njëjta për reformën zgjedhore.
Sipas Ballës, është e kotë që Luan Rama të bëjë edhe arbitrin, edhe lojtarin.
Postimi i Taulant Ballës:
“I them mikut tim Luan Rama që barazlargimi i tij, duke fajësuar po njësoj edhe PS edhe PD për Reformën Zgjedhore është i padrejtë, për të mos thënë më shumë! Luan Rama duhet ta dije se PS dhe LSI janë bashkë në Komisionin e Reformës Zgjedhore dhe kanë qëndrime plotësisht të dakordësuara mbi rekomandimet e OSBE/ODHIR-it. Po ashtu Luan Rama me siguri e di që kemi një muaj që presim që PD të bëhet pjesë konstruktive e punës së komisionit për ta mbyllur reformën. Prandaj Luan Rama le t’i bëjë thirrje PD siç i bëjmë edhe ne po ashtu, sepse roli i dyfishtë i skuadrës dhe arbitrit nuk ka më asnjë kuptim! PS dhe LSI kanë bërë një punë shumë serioze në komision dhe respekti për këtë skuadër është minimumi që duhet të tregojë miku Luan Rama pavarësisht se mund t’i ketë rënë të bëjë pjesën e arbitrit!”
Apeli i Luan Ramës:
“Në emër të LSI, edhe një herë i ftoj forcat politike që përfaqësohen në Kuvend në mënyrë të veçantë PD dhe PS që të demonstrojnë angazhimin e tyre real në mënyrë që të bëjnë të mundur reformën zgjedhore.
LSI është e gatshme të bashkëpunojë dhe të ofrojë kontributin e vet për të bërë të mundur konsensusin e nevojshëm që edhe reforma zgjedhore të bëhen me konsensusin e të gjitha palëve duke dëshmuar përgjegjshmëri përballë qytetarëve”
Discussion about this post