Kërkohej për terrorizëm në Itali, flasin familjarët e Lubjana Gjeçajt: Nuk u arrestua, shkoi vetë në drejtorinë e Policisë

Prokuroria e Tiranës ka paraqitur në Gjykatën Penale kërkesën për caktimin e masës arrest me afat 40 ditor për Lubjana Gjeçajn, 43-vjeçaren e arrestuar pak ditë më parë në Tiranë, e akuzuar për ”Organizatë me qëllime Terroriste”.

Sipas familjarëve të Gjaçajt, ajo nuk është arrestuar siç ka raportuar policia, por është thirrur në Drejtorinë Vendore të Policisë së Tiranës dhe nga aty i është komunikuar se ka një fletë arresti për të për llogari për shtetin italian, dhe pritet të ekstradohet.

Lubjana Gjeçaj është në dijeni të vendimit për dënimin e saj në Itali me 3 vite burg, ndërsa pritet të kërkoj që dosja e saj në shtetin italian të transferohet në Shqipëri, për shkak se është nënë e tre fëmijëve.

Masa për 43-vjeçaren pritet të jepet në Penalen e Tiranës ditën e martë, në orën 09:30, me gjyqtare Vjollca Spahiun. Lubjana Gjeçaj njihet në shtetin italian si rekrutuese xhihadiste për llogari të Shtetit Islamik.

(E.K/Faxweb.al)