Lubonja flet ashpër kundër Lu-së: Çështja Llalla mban erë të keqe, ja pse

Analisti Fatos Lubonja shprehet se akuzat e ambasadorit Donald Lu ndaj Adriatik Llallës përbëjnë një skandal politik.

Kjo për faktin se sipas analistit vetëm në Shqipëri ndodh që një ambasador të akuzojë një prokuror të Republikës.

Në rast se akuzat janë të vërteta shprehet Lubonja, atëherë do të duhet që të kishin edhe prova, dhe sipas tij e gjithë situata e krijuar me Llallën mban erë të keqe.

“Ka pasur një anomali që po e thanë amerikanët është e padiskutueshme. Në qoftë se një njeri ka bërë korrupsion pse na nevojitet vettingu për të zbuluar korrupsionin. Ne s’qenkemi të zot të arrestojmë ca njerëz për korrupsion dhe vjen ambasadori amerikan thotë të bëhet vetting.

Lidhur me Llallën, këtu ka një çështje konkretisht. Lidhur me Llallën ka një çështje, po ta marrim konkretisht. Amerikanët ose kanë prova nga shërbimet e tyre, dhe po patën atëherë duhet të ketë tjetër listë. Sepse nuk qenka Llalla vetëm peshku i madh. Në qoftë se shërbimet amerikanë qenkan përqendruar vetëm tek Llalla, ka diçka që nuk shkon. Se kemi kryeministra, ish-kryeministra, presidentë e ku di unë.

Ose është ajo tjetra një arsye politike. Pra se ka penguar reformën në drejtësi. Po pse more do më heqë njeri mua vizën se nuk besoj tek reforma në drejtësi.

Kemi të bëjmë me një skandal politik. Vetëm në Shqipëri mund të ndodhë që një ambasador të akuzojë një prokuror të Republikës. Nxirr provat. Është skandal sepse nuk ke provë. Ose nëse e ke nga shërbimet nxirr provat ose mbetet personale. Nuk shkon por ne jemi të obsesionuar se po e tha Amerika e tha Zoti. Është një gjë që mban erë të keqe për mua. Është fyese për Shqipërinë, për dinjitetin e të gjithëve, cilido qoftë ai”, u shpreh Lubonja.

(E.K/FAXWEB.AL)