Intervista e kryeministrit Rama në studion e Ylli Rakipit ka ngjallur debate të shumta në lidhje edhe me mungesën e personave të tjerë të pranishëm.
Është e zakonshme që në emision të jenë të pranishëm edhe analistë të tjerë si Lubonja apo Bushati që këtë herë nuk ishin.
Një përgjigje për të gjitha pikëpyetjet e ka dhënë vetë Lubonja i cili është shprehur se mungesa e tyre në emision ishte kushti i Ramës për të qenë i pranishëm.
“Shfaqjen e Ramës në emisionin “Të paekspozuarit” e ndoqa me vëmendje jo vetëm për arsye se është emisioni në formatin e të cilit bëj pjesë, por edhe pse shumë njerëz më morën në telefon për të më pyetur se pse nuk isha aty së bashku me Bushatin.
Kur u thashë se Edi Rama nuk vinte në emision po të ishim ne, një pjesë shprehën habinë, duke më kujtuar se me ne ishin ulur përballë edhe lideri i opozitës Basha edhe Kryetari i kuvendit Ilir Meta; të tjerë thanë “sjellje “normale” kjo për Ramën”. Megjithatë, të dy palët nuk e kanë pritur, besoj, që Rama, në vend se të mos merrej me ne personalisht, përderisa nuk kishte dashur të ishim aty, do të bënte krejt të kundërtën”, shkruan Lubonja. (E.K/SHUPLAKA)
