Tetori shënohet si muaji i luftës kundër kancerit të gjirit. Në 6 mujorin e parë të këtij viti janë kryer mbi 700 mamografi në Shkodër, ku 79 prej tyre kanë rezultuar pozitive. Një shifër e tillë e lartë u bë e ditur nga vetë drejtorja e Operatorit të Kujdesit Shëndetësor Shkodër, Suida Kuka.
Ajo tregon se moshat më të prekura janë mbi 45 vjeçe, ndërsa i bën thirrje grave që të bëjnë mamografinë. Kuka foli edhe për mamografinë e lëvizshme, e cila do të jetë në rajonin e veriut në gjysmën e dytë të muajit.
“I bëhet thirrje çdo nëne, çdo vajze për bërjen e mamografive, dhe të shkojnë drejt poliklinikave. Eshtë muaji kur i gjithë sistemi shëndetësor është në terren për sensibilizim. Kemi angazhuar spitalet, promocioni është çdo ditë në terren, deri më tani Shkodra është përgjigjur mirë, kemi 200 mamografi, ndërsa si rajon jemi të dytët në vend.
Në 6 muajt e parë të vitit janë kryer 723 mamografi, ku 79 nga këto kanë dalë pozitive, është shifer relativisht e madhe dhe na bën të reflektojmë më tepër, është thirrje për gratë të mos hezitojnë dhe mos të vonojnë ekzaminimet. 45 e lart është grupmosha më e prekur.
Mamografia e lëvizshme momentalisht ndodhet në Tiranë dhe Elbasan, pritet që nga data 12 deri në fund të muajit do jetë në rajonin e veriut, do jetë në çdo vend ku njerëzit e kanë të vështirë të shkojnë te spitalet, zakonisht në zonat malore”-u shpreh Kuka.
Discussion about this post