Kushtet e një marrëveshjeje midis Izraelit dhe Hamasit për një armëpushim në Gaza dhe lirimin e pengjeve janë duke u finalizuar.
Lajmi është konfirmuar nga një zyrtar palestinez, sipas BBC.
Një deklaratë e tillë vjen pasi presidenti amerikan Joe Biden tha se një marrëveshje ishte “në prag” të realizimit dhe se administrata e tij po punonte urgjentisht për këtë çështje.
Presidenti i SHBA Joe Biden foli me kryeministrin izraelit Benjamin Netanyahu të dielën dhe me Sheikh Tamim bin Hamad Al-Thani të Katarit, i cili po ndërmjetëson negociatat, të hënën.
Zyrtari palestinez i tha BBC-së se Hamasi dhe zyrtarët izraelitë po zhvillonin bisedime indirekte në të njëjtën ndërtesë të hënën. Duke zbuluar disa detaje të mundshme të marrëveshjes, zyrtari deklaroi se diskutimet e detajuara teknike morën kohë të konsiderueshme.
Të dyja palët ranë dakord që Hamasi të lironte tre pengje në ditën e parë të marrëveshjes, pas së cilës Izraeli do të fillonte tërheqjen e trupave nga zonat e populluara.
Shtatë ditë më vonë, Hamasi do të lironte katër pengje të tjera dhe Izraeli do të lejonte njerëzit e zhvendosur në jug të ktheheshin në veri, por transporti i tyre do të bëhej vetëm në këmbë përmes rrugës bregdetare. Makinat, karrocat e tërhequra nga kafshët dhe kamionët do të lejohen të kalojnë përmes një kalimi ngjitur me rrugën Salah al-Din, të monitoruara nga një makinë me rreze X e operuar nga një ekip sigurimi teknik Katar-Egjiptian.
Marrëveshja përfshin dispozita që forcat izraelite të qëndrojnë në korridorin e Filadelfit dhe të mbajnë një zonë 800 metra përgjatë kufirit lindor dhe verior gjatë fazës së parë, e cila do të zgjasë 42 ditë.
Izraeli gjithashtu ka rënë dakord të lirojë 1000 të burgosur palestinezë, duke përfshirë rreth 190 të cilët kanë vuajtur dënime prej 15 vjetësh ose më shumë. Në këmbim, Hamasi do të lirojë 34 pengje.
Negociatat për fazën e dytë dhe të tretë të marrëveshjes do të fillonin në ditën e 16-të të armëpushimit.
