Kryeqyteti britanik bëhet sot skenë e një raundi të ri bisedimesh diplomatike, ku Sekretari i Jashtëm i Mbretërisë së Bashkuar, David Lammy, do të presë përfaqësues nga SHBA-ja dhe Bashkimi Evropian për të diskutuar rrugët drejt zgjidhjes së konfliktit në Ukrainë. Në qendër të bisedimeve do të jetë një përpjekje e re për të gjetur një formulë që mund të çojë drejt ndalimit të luftimeve.
Këto diskutime vijnë në një moment delikat, pasi disa burime diplomatike kanë lënë të kuptohet se Moska mund të jetë e gatshme të zbutë qëndrimet e saj, përfshirë heqjen dorë nga disa pretendime territoriale – ndonëse bëhet fjalë për zona që aktualisht nuk janë nën kontrollin rus.
Bisedimet në Londër pasojnë muaj negociatash të heshtura të udhëhequra nga Shtëpia e Bardhë, të cilat nuk kanë prodhuar rezultate të prekshme. Nga ana tjetër, Rusia vazhdon të insistojë në njohjen ndërkombëtare të aneksimit të Krimesë dhe mbajtjen e kontrollit mbi territoret e pushtuara në lindje të Ukrainës – çështje që mbeten pengesa kyçe për arritjen e një kompromisi të pranueshëm.
Nëse negociatat do të çojnë drejt një marrëveshjeje të qëndrueshme, varet në masë të madhe nga aftësia e Ukrainës dhe aleatëve perëndimorë për të mbrojtur parimet themelore të sovranitetit dhe integritetit territorial, duke mos rënë dakord për kushte që do të legjitimonin pushtimin rus.
Sipas disa raporteve, Rusia është duke shqyrtuar idenë e ngrirjes së konfliktit përgjatë vijës aktuale të frontit, me kusht që Perëndimi të pranojë zyrtarisht aneksimin e Krimesë nga viti 2014. Por për Kievin, kjo është një vijë e kuqe. Presidenti Volodymyr Zelensky e ka bërë të qartë se “Ukraina nuk do ta njohë kurrë pushtimin e Krimesë”, duke theksuar se çdo marrëveshje e tillë do të binte ndesh me kushtetutën e vendit.
Ndërkohë, Ukraina ka shprehur gatishmëri për të shqyrtuar një armëpushim, me kusht që ai të mos përfshijë ndonjë legjitimizim të ndryshimeve territoriale të imponuara me forcë.
