Bashkërenduesi i Bashkimit Evropian për luftën kundër terrorizmit, Gilles de Kerchove, bën thirrje për përmirësimin e shkëmbimit të informacioneve ndërmjet vendeve të BE-së dhe me Shtetet e Bashkuara dhe Turqinë, për të vëzhguar me mirë luftëtarët e huaj që kanë qëndruar përkrah grupit militant Shteti Islamik.
Ai pritet që këtë çështje ta diskutojë nesër në takimin e ministrave të Brendshëm të Bashkimit Evropian të cilët do të mblidhen për të debatuar shtimin e përpjekjeve për të penguar të kthyerit që mund të jenë dërguar nga ISIS- për të kryer sulme në vendet e tyre.
Gilles de Kerchove, vlerëson se rreth 2000-2500 “luftëtarë të huaj terrorist”, nga Evropa janë ende në Siri dhe në Irak.
Në dokumentin e tij, të siguruar nga Reuters, thuhet se, midis 600 dhe 1 mijë luftëtarë të huaj janë vrarë tashmë, ndërsa 1200-1750 janë kthyer në Evropë.
“Është me rëndësi që të shkëmbehen informacione për të kthyerit ne Evropë, atyre që janë duke udhëtuar por edhe atyre që janë ende në zonën e konfliktit. Janë kryesisht dy kategori të të kthyerve. Ata që kthehen parapa pa ndonjë synim dhe ata që dërgohen prapa me mision të caktuar që është edhe shqetësimi kryesor”, thotë ai në dokument.
Ai nuk pret ndonjë valë masive të të kthyerve por edhe më parë ka tërhequr vëmendjen se ISIS-i mund të sulmojë sërish Evropën.
Sipas tij, BE-ja duket të kërkojë më shumë informacione të mbledhura në Siri e Irak nga Shtete e Bashkuara dhe u bën thirrje vendeve anëtare që të përditësojnë më rregullisht të dhënat, përfshirë edhe ato biometrike.
Vlerësimet e organizatave të ndryshme të përfshira në luftën kundër terrorizmit flasin për rreth 6 mijë luftëtarë nga Evropa që mund t’u jenë bashkuar konflikteve në Siri dhe Irak.
Rreth 900 luftëtarë nga Ballkani mund t’u jenë bashkuar konflikteve pas shpërthimit të luftës në Siri.
