Dëmtimi në momentet e fundit i atletes Luiza Gega ka bërë që Shqipëria të mos ketë asnjë sportistë në Kampionatin Botëror të Atletikës që po zhvillohet në Londër.
Dëmtimi i Gegës ka ndodhur në mënyrë disi enigmatike dhe deri më tani nga vetë sportistja nuk ka një reagim.
Më datën 1 gusht, vetë Gega në konferencë për shtyp deklaroi se do të jepte maksimumin në këtë kompeticion dhe se pretendonte të shkonte në finale në garën e 3000 m/p.
Po kjo dëshirë e atletes është ndërprerë në mes për shkak të dëmtimit. Ndërkaq trajneri i atletes, Taulant Stërmasi ka reaguar për gazetën ‘’Panorama sport. Ai shprehet se është një zhgënjim i madh kjo që ka ndodhur.
“Erdhi dëmtimi në momentin më të papërshtatshëm të mundshëm.
Jemi munduar që të evitojmë dëmtimet pasi ishte e vetmja gjë që mund të ndalte Luizën në progresin e saj në garën e saj të 3000 m/p. Po kalonte një formë shumë të mirë sportive, por ndonjëherë nuk është fati me të. Sigurisht, dëmtimi vjen për disa shkaqe të parashikuara e të paparashikuara. Infrastruktura e munguar ka qenë një nga shkaqet kryesore që la jashtë këtij Botërori Luizën.
Në këto raste, unë e Luiza jemi të vegjël para këtyre problemeve që sado të mundohemi, nuk ngelin zgjidhjet në dorën tonë. Jemi vërtet të mërzitur pasi rezultatet e Luizës në “Diamond League” në Oslo 9.26.05 dhe në Bursa Turqi 1 muaj më parë me kohën 9.29.18 i jepnin atletes tonë kualifikimin për në finale”, deklaroi Stërmasi në reagimin e tij për gazetën.
(E.K/SHUPLAKA)
