Lulzim Basha e ka thënë qartë sot nga çadra ku po fliste mes sipërmarrësve se është gati për dialog me Edi Ramën, por me një kusht.
”Ndaj nëse do të ketë dialog politik, siç e kemi kërkuar që prej ditës së parë, ky dialog politik nuk do të kthehet kurrë në një dialog të pistë mes politikanëve të opozitës dhe pozitës që të vazhdojë komploti por do jetë dialogu politik që përmes standardit politik europian përmes zgjedhjeve të lira dhe të ndershme, do t’i japë fund Republikës së vjetër, rrugëve të vjetra dhe mënyrave të vjetrave, që çdo gjë që në këtë vend mban peng shpresat dhe zhvillimin.’‘, kërkoi Basha sot nga sheshi para Kryeministrisë.
”Sot më shumë se kurrë jam po aq i vendosur dhe më i inkurajuar se kurrë se e di që në këtë përballje nuk përfaqësoj hallin tim, as interesat e ngushta të një partie por përfaqësoj hallet dhe interesat e shqiptarëve të ndershëm të cilët janë bekimi i Republikës së Re që po vjen.”, vazhdoi më tej ai.
”Lulëzim ta kam thënë kaherë, jam i gatshëm për dialog sa herë PD do dialog dhe për gjithçka, kudo e kurdo! Caktoje vetë vendin dhe orën”, shkruante dje Edi Rama, teksa shtonte se nëse zbatohet Kushtetuta është gati për çdo negociatë.
ÇFARË I OFROI RAMA PAS DEKLARATËS SË METËS SE NUK MERRTE PJESË NË ZGJEDHJE PA OPOZITËN:
”E vlerësoj përpjekjen e bashkëkryetarit të koalicionit qeverisës, Ilir Meta, për të kërkuar një zgjidhje që kënaq Partinë Demokratike.
Edhe unë kam qënë dhe mbetem i gatshëm per cdo zgjidhje që i’a lehtëson Partisë Demokratike rrugën për t’u kthyer në Kuvend; votuar Vetingun; vazhduar betejën e vet politike në shinat e Kushtetutës e të ligjshmërisë dhe garantuar bashkë me ne, që zgjedhjet e 18 qershorit të jenë më të lirat e më të ndershmet të zhvilluara ndonjëherë në Shqipëri.
Qeveria jonë është angazhuar në një rrugë reformash tërësore. Kemi vendosur një bazë ligjshmërie për të bërë shtet, në vend të rrëmujes së paligjshmërisë pa shtet. Kemi rikthyer rritjen e qendrueshme ekonomike, në vend të batakut të një ekonomie të zhytur në borxhe paralizuese e korrupsion mbytës. Dhe as do te kthehemi mbrapa, as do të ndalemi në rrugën që na ka përcaktuar mandati i popullit, pse një pakicë ka frikë nga Vetingu dhe nga gjykimi i popullit në zgjedhje!
Nëse Partia Demokratike kërkon një diskutim serioz me ne, jam i gatshëm të ulemi për të diskutuar, që sot, edhe në çadër po të jetë nevoja. Dialogu ka qenë e mbetet gjithnjë zgjedhja ime e parë dhe unë kam qenë e jam i hapur për cdo kërkesë apo zgjidhje, që nuk cënon Kushtetutën e nuk i bie ndesh standarteve demokratike.
Kushtetuta jonë është shumë e qartë – zgjedhjet duhet të mbahen në 18 qershor.
Kushtetuta është shumë e qartë – qeveria është vullnet i shumicës.
Nëse biem të gjithë dakord me Kushtetutën, unë jam i bindur se mund të biem dakord për gjithcka tjetër.” (V.G/SHUPLAKA)
