Kreu i Partisë Demokratike Lulzim Basha deklaron nga “Çadra e lirisë”, aty ku sot është i pranishëm edhe forumi i gruas, që kjo protestë nuk do të marrë fund, derisa të arrihen qëllimet e nisjes së saj.
Basha u shpreh përpara grave dhe nënave të mbledhura aty sot, se mbi të gjitha ai po lufton pikërisht për të iu ardhur në ndihmë atyre.
“Me zgjedhje të lira dhe të ndershmë Partia Demokratike është e gatshme të garojë dhe të fitojë, për t’u ardhur në ndihmë grave dhe nënave të shtëpisë. Për ofertën e një shëndetësie ku paratë e taksapaguesve nuk zhduken por kthehen me shërbime dinjitoze, çmime të përballueshme. Për një Shqipëri ku fëmijët shqiptarë, nuk kanë pse enden rrugëve, por të kenë mundësi që të vazhhdojnë të qëndrojnë në ambientet arsimore, ndërkohë që gratë nënat të kthehen nga puna.”, tha Basha.
Ndërkaq, kreu i opozitës tha se nuk ka negociata me qeverinë për të ndërprerë protestën, pasi ajo do të vijojë derisa të arrihet qeveria teknike.
“Si t’i japim fund kësaj? Vetëm me votën e lirë dhe zgjedhje të ndershme. Shqiptarët e kanë marrë vendimin dhe ne jemi këtu pasi ky vendim do të zbatohet patjetër. Ne nuk jemi këtu për t’u lutur sepse nuk kemi pse t’i lutemi askujt. Do vijë dita kur do të luten ata, të cilët nuk ka lutje që t’i shpëtojë nga zgjedhja e popullit.
Një qeveri e mirë nuk mund të ketë zanafillë tjetër, përveçse kur është e zgjedhur me votë të lirë dhe zgjedhje të ndershme. Nëse ka një mision të shenjtë për të cilin ia vlen është siguria, liria mirëqenia për brezat që do vijnë. Por siguri, liri, mirëqenie nuk mund të ketë nëse qeveria bie në errësirë, drogë, korrupsion. Do ketë zero negociata për qeverinë teknike dhe zgjedhje të lira. Largim të këtij kryeministri të bërë njësh me krimin. Mos t’i bëjnë llogaritë gabim.”, tha Basha.
Ndërkohë ai falenderoi të gjithë të pranishmit për ngritjen e tyre në protest. “Një komb i tërë ju është mirënjohës që vendosët të sakrifikoni dhe të bëheni pjesë, kjo lëvizje që nisi të shtunën do të përfundojë vetëm me fitoren e qytetarëve shqiptarë.”, tha Basha. (D.D/Shuplaka)
