Kreu i Partisë Demokratike, Lulzim Basha nga Shkodra ka thënë se aksioni opozitar ka treguar se sot falë tij vendi ka shpresë. Ai ka përjashtuar mundësinë që zgjidhja e krizës politike të vijë nga jashtë, duke përdorur termin ‘bashkim i shqiptarëve’ si e vetmja rrugë që sipas tij ofron një zgjidhje përfundimtare.
Basha nuk ka lënë pa hedhur akuza edhe ndaj kryebashkiakëve të përfolur për të shkuarën e tyre kriminale, ndërkohë ka theksuar se aksioni opozitar do të vijojë.
“Të gjithë të zgjedhurit e qarkut të Shkodrës kanë të shkuar kriminale. Siç e shihni Edi Rama nuk ka asnjë reagim për situatën. Ndaj ne kemi marrë këtë aksion prej 6 muajsh dhe do të vazhdojmë aksionin tonë. Është detyra jonë si opozitë e bashkuar të hapim rrugët për zgjidhjen e kësaj krize. Ne nuk do t’ju hapim rrugën as Babanit, as Kajmakut, as Pjetrit as atyre që janë në Kuvend. Do sigurojmë që rruga e zgjidhjes së kësaj krize të jetë sa më pak e mundimshme dhe sa më e shkurtër. Ka një sensibilizim dhe rrebelizim të madh. Triumfi i të keqes mbi të mirën nuk do të ndodh më. Shkodra ka qenë dhe do të vijojë të mbetet triumfi i vlerave kundër anti-vlerave. Unë gjatë kësaj vizite jam edhe në rolin e dikujt që ka ardhur të frymëzohet nga mos nënshtrimi siç e ka treguar gjithmonë Shkodra si bastion i djathtë. Kjo krizë zgjidhet jo nga jashtë, por nga bashkimi, ndërkombëtarët janë miqtë tanë dhe bashkëpunëtorët tanë. Mungesa e dialogut ka ardhur për shkak të lidhjes së krimit me politikën, nuk dialogohet me krimin dhe prioriteti ynë është ndarja e krimit nga politika. Po të mos ishte kjo rezistencë sot nuk do të ishim në këto kushte ku duhet thënë se ka shpresë. Ne jemi të vendosur për t’ju kthyer pushtetin e qytetarëve dhe jo Tom Doshëve”.
(F.GJ/FAXWEB.AL)
