Kreu i Partisë Demokratike, Lulzim Basha ka takuar ditën e sotme disa drejtues të Shoqatës Shqiptare të Turizmit të cilët pohon ai, i kanë shprehur shqetësimin e thellë për krizën dhe mungesën e mbështetjes nga qeveria për sektorin e turizmit.
Basha shkruan se sektori i turizmit ka aktualisht të punësuar 93 000 persona dhe në rrjetin zinxhir të tij pothuajse 200 000 të tjerë, ‘çka e bën edhe më jetike ndërhyrjen e menjëhershme të qeverisë në mbështetje të turizmit’.
“Deri më sot, operatorët nuk kanë përfituar mbështetjen për pagën e punonjësve dhe nuk kanë arritur as të përfitojnë nga garancitë sovrane, për shkak të vonesave në nxjerrjen e akteve nënligjore nga qeveria”, shkruan Basha.
Teksa shpreh mbështetjen e tij për këtë sektor, kreu i opozitës prezanton edhe një platformë me 5 pika ndaj qeverisë.
Reagimi i plotë:
Sot prita drejtuesit e Shoqatës Shqiptare të Turizmit. Presidenti i shoqatës Enver Mehmeti, Kryetar i Sektorit të Hoteleve Zak Topuzi dhe Kryetari i Sektorit te Agjensive Turistike Sokol Hoxha më shprehën shqetësimin e thellë për krizën dhe mungesën e mbështetjes nga qeveria për sektorin e turizmit. Sektori i turizmit ka aktualisht të punësuar 93 000 persona dhe në rrjetin zinxhir të tij pothuajse 200 000 të tjerë, çka e bën edhe më jetike ndërhyrjen e menjëhershme të qeverisë në mbështetje të turizmit.
Deri më sot, operatorët nuk kanë përfituar mbështetjen për pagën e punonjësve dhe nuk kanë arritur as të përfitojnë nga garancitë sovrane, për shkak të vonesave në nxjerrjen e akteve nënligjore nga qeveria.
Veç humbjeve të muajve të karantinës, shumica e prenotimeve për sezonin e ri janë anulluar duke vënë në rrezik mbijetesën e këtij sektori kaq të rëndësishëm për ekonominë shqiptare.
Ne i mbështesim kërkesat e tyre të drejta dhe i kërkojmë qeverisë ti marrë ato në konsideratë sa më parë:
1.Të garantohet ndihma financiare me qëllim mbajtjen në punë të punëtorëve.
2.Të jepet subvencionim i plotë dhe në kohë për kontributet shoqërore dhe shëndetësore.
3.Të sigurohet likuiditeti përmes skemave të garancisë shtetërore pa kosto për biznesin.
4.Të anullohen/shtyhen detyrimet tatimore qendrore dhe lokale, të cilat vazhdojnë të vijnë rregullisht si në kohë “normale”.
5.Të bashkëpunohet ngushtë me Kosovën, Maqedoninë e Veriut dhe vendet e tjera fqinje, për të garantuar flukse të ndërsjellta turistësh dhe shtuar mundësitë për turizmin shqiptar.
(F.GJ/FAXWEB.AL)
Discussion about this post