Lushnjë-Fier/ Kamioni përplas ambulancën, vdes pacienti që po transportohej në Tiranë (PAMJE)

Dashamir Koçaj 77 vjeç, ka humbur jetën gjatë kohës që po transportohej me ambulancë për në Tiranë si pasojë e një aksidenti të ndodhur pak minuta më parë në kryqëzim të autostradës Lushnjë-Fier, në vendin e quajtur “Rotondo e Savres”.

Burime për FaxNews bëjnë me dije se një kamion i drejtuar nga 31-vjeçari Leonard Gjini është përplasur me ambulancën e cila ishte duke transportuar 77-vjeçarin në Tiranë.

Mësohet se i ndjeri nuk ka mundur t’i mbijetojë lëndimeve dhe ka humbur jetën.

Të lënduar kanë mbetur drejtuesi i ambulancës, infermierja dhe vajza e 77-vjeçarit, të cilët janë dërguar në spital.

Gazetarja e FaxNews, Marsela Topi raporton se mjeti tip kamion “ICECO” me targa AA288UR me drejtues mjeti Leonard Gjini i datëlindjes 08.03.1992 është përplasur me mjetin tip “Ford” me targa AB883CF (ambulanca), me drejtues shtetasin Flori Ramo.

Në vendngjarje kanë shkuar menjëhere policia dhe grupi hetimor për të zbardhur dinamikën e këtij aksidenti të rëndë.

(Xh.H/FaxWeb.al)