Lyen veten me benzinë dhe tenton të vetëdigjet përpara Gjykatës së Vlorës

Një person ka tentuar t’i vërë flakën vetes me benzinë.

Ngjarja ka ndodhur ditën e sotme, përpara Gjykatës së Vlorës.

Sipas burimeve zyrtare për fat të mirë policia ka ndërhyrë në kohë duke parandaluar ngjarjen e rëndë.

“Sot rreth orës 10:20, Salla Operative Vlorë është njoftuar nga një telefonatë se në lagjen ”Rilindja”, përpara Gjykatës së Apelit Vlorë, një shtetas ka lyer veten më lëndë djegëse (benzinë). Mënjëherë pranë vendit të ngjarjes shkuan shërbimet e Policisë të cilët arritën të parandalonin në kohë që shtetasi A.C., 38 vjeç, të mos i shkaktonte vetes asnjë dëmtim. Shtetasi po pyetet pranë ambienteve të Policisë për të sqaruar dhe zbardhur motivet që e çuan të ndërmerte një veprim të tillë, ku më parë iu ofrua ndihmë psikologjike”,- bëri të ditur policia e Vlorës.