Presidenti francez Emmanuel Macron tha të hënën, se bllokada humanitare e Gazës ishte një “skandal” dhe “e turpshme”, duke bërë thirrje për rihapjen e rrugëve të furnizimit humanitar.
Macron bëri thirrje gjithashtu për një armëpushim në territorin e rrethuar palestinez, ndërsa dhjetëra mijëra njerëz organizuan tubime në të gjithë Francën pasi Izraeli ndaloi një anije që mbante aktivistë, përfshirë Greta Thunberg. Tubimet në Paris dhe të paktën pesë qytete të tjera u thirrën nga partitë e krahut të majtë. Jean-Luc Melenchon, kreu i partisë Franca e Papërkulur (LFI), e quajti konfiskimin e anijes së Gazës nga ushtria izraelite “pirateri”.
Ndërkohë, Macron kërkoi lirimin e menjëhershëm të shtetasve francezë midis 12 aktivistëve në anije. Ai “kërkoi që gjashtë shtetasve francezë t’u lejohet të kthehen në Francë sa më shpejt të jetë e mundur”, tha zyra e tij.
Franca ishte “vigjilente” dhe “qëndron pranë të gjithë shtetasve të saj kur ata janë në rrezik”, shtoi ai. Qeveria franceze i bëri thirrje Izraelit të sigurojë “mbrojtjen” e aktivistëve dhe gjithashtu e quajti bllokadën humanitare të Gazës “një skandal” dhe një “turp”.
