U deshen 24 orë që policia të përfundonte peshimin e lëndës cannabis sativa të sekuestruar një ditë më parë në magazinën e ish-pularisë në qytetin verilindor të Rrëshenit, Mirditë.
Kështu, sipas një njoftimi zyrtar, në atë magazinë u gjetën plot 4238 kg kanabis në gjendje të thatë. Në operacionin e djeshëm u arrestuan 22 shtetas. Gjithashtu, nga këta 22 persona 9 janë lënë në procedim në gjendje të lirë.
Policia thotë se sasia e drogës tashmë është magazinuar dhe do të asgjësohet. NJOFTIMI Në vijim të operacionit policor antikanabis “Befasia” të nisur dje në Rrëshen Mirditë, nga Drejtoria Vendore e Policise Lezhë në bashkëpunim me Policinë e Rrëshenit dhe FNSH, ku u arrestuan 22 shtetas, u proceduan penalisht në gjendje të lirë 9 shtetas dhe u shpall në kërkim pronari i magazines, para pak minutash ka përfunduar peshimi total i sasisë së lëndës narkotike të sekuestruar .
Nga peshimi rezultoi se në magazinë kishte 4238 kg bimë narkotike cannabis – sattiva në proces tharje e përpunimi. Sasia bimore narkotike e sekuestruar është magazinuar. Grupi hetimor në bashkëpunim me Prokurorinë po vijojnë veprimet për dokumentimin e plotë të kësaj veprimtarie .