Pandeli Majko ka ripublikuar sërish komentin e tre ditëve më parë lidhur me çështjen e Kosovës. Në statusin e publikuar më 15 janar, deputeti shprehet se serbët janë më të aftë në luftë se sa në paqe. Prandaj presidenti serb Nikoliç sipas tij, ka deklaruar se do të dërgojë ushtrinë e tij në Kosovë. Por për Majkon, “të thuash dhe të bësh, janë dy gjëra të ndryshme në politikë”.
Statusi i Pandeli Majkos :
Serbia nëpërmjet deklarimeve të presidentit të saj ka deklaruar se “do të dërgojë ushtrinë” në Kosovë. Një deklarim i tillë ka kohë që nuk dëgjohet nga politika serbe. Kjo mënyrë sjellje pati pasojë gjakosjen e rajonit dhe dërgoi në Gjykatën e Hagës lidershipin e Beogradit. Të thuash dhe të bësh, janë dy gjëra të ndryshme në politikë.
Historia ja ka dhënë serbëve dhe shqiptarëve mësimet e saj. Dialogu është opsion i zgjidhjeve europiane dhe ka raport me të vërtetën e paqes që duan kombet në rajon. Kjo e vërtetë fton gjakftohtësinë të kuptojë. Politikan nuk të bën lufta. E kundërta është e vërtetë.
Trim nuk të bëjnë deklaratat e luftes. Kjo është po aq e vërtetë sa fakti se një tren nuk bëhet kishë me piktura fetare. Të kuptuarit e luftës është akt dhe jo deklaratë. Kjo do pak mençuri në të kuptuar, e cila kombit serb, si rregull, nuk i ka munguar. Për më tepër, shqiptarët kanë një të metë kombëtare. Ata janë më të aftë në luftë se sa në paqe. Sigurisht.
Discussion about this post