Një nga makinat e Papa Françeskut, të cilën i ndjeri e përdorte për të përshëndetur mijëra njerëz, do të shndërrohet në një klinikë shëndetësore të lëvizshme për të ndihmuar fëmijët e Gazës.
Pas një kërkese nga Papa Françesku, automjeti i përdorur gjatë vizitës së tij në Betlehem në vitin 2014 po ripajiset me gjithçka që nevojitet për kujdesin shëndetësor, tha organizata bamirëse Caritas, e cila po mbikëqyr projektin.
“Do të ketë teste të shpejta, komplete qepjeje, shiringa, furnizime me oksigjen, vaksina dhe një frigorifer të vogël për ruajtjen e ilaçeve”, shpjegoi ajo në një deklaratë.
Vatikani tha se kjo ishte “dëshira e fundit e Papës për fëmijët e Gazës” para se të vdiste muajin e kaluar. Automjeti është aktualisht në Betlehem dhe do të hyjë në Gaza kur Izraeli të hapë një korridor humanitar.
Lufta midis Izraelit dhe Hamasit në Rripin e Gazës ka vrarë më shumë se 15,000 fëmijë dhe ka zhvendosur gati një milion që kur shpërtheu në tetor 2023, raporton UNICEF.
“Me anë të këtij automjeti, ne do të jemi në gjendje të arrijmë tek fëmijët që sot nuk kanë qasje në kujdes shëndetësor, fëmijë që janë të lënduar dhe të kequshqyer”, tha në një deklaratë Peter Brune, Sekretari i Përgjithshëm i Caritas.
