Kristiano Ronaldo ka triumfuar për të katërten herë si lojtari më i mirë në botë. Ylli i Realit të Madridit mori mbrëmjen e djeshme trofeun “Topi i Artë” për 2016-ën pasi bëri një sezon të shkëlqyer me skuadrën dhe kombëtaren e tij duke fituar Ligën e Kampionëve dhe Kupën e Europës “Francë 2016”.
Fitorja e këtij çmimi ka shkaktuar ekzaltim të madh tek klubi i Mançester Junajtid, ku sulmuesi ka luajtur nga viti 2003 deri në 2009-ën ku arriti të fitojë “Topin e Artë” për të parën herë.
Ronaldo ka qenë një ndër lojtarët më të rëndësishëm në radhët e “djajve të kuq” ku nuk i ka munguar mbështetja e Sër Alex Ferguson, i cili e ka cilësuar si më të mirin në botë.
Klubi anglez e ka përgëzuar CR7-ën përmes një postimi në profilin zyrtar në “Facebook” për trofeun e fituar. Mirëpo tifozët e ekipit kanë reaguar jo mirë për këtë postim ndaj komentet e tyre qenë të shumta duke e quajtur “patetik” qëndrimin e tyre, pasi Ronaldo luan për një ekip tjetër.
Tifozët shkruajnë se klubi duhet të përqendrohet tek lojtarët e tij dhe jo tek ato të ekipeve të tjera. Mes komentesh nuk kanë munguar dhe ato pozitive.
Discussion about this post