Kryetarja e Gjykatës Kushtetuese Hola Zaçaj është pyetur sot në lidhje me vendimin për çështjen e mandatit të Olta Xhaçkës.
Zaçaj deklaroi se nuk duhet të vihet në pikëpyetje zbatimi i vendimeve të GJK, pasi nuk ka mënyrë tjetër sjelljeje nëse duam të jemi institucione të një shteti ligjor që udhëhiqet nga parimi i demokracisë.
“Të vësh në pikëpyetje zbatimin e vendimeve të Gjykatës Kushtetuese, është e paimagjinueshme në një shtet ligjor. Duke patur formën e ligjit dhe duke mos patur asnjë ekuivok për të mos u zbatuar, gjykata Kushtetuese nuk ka mekanizma për të kontrolluar zbatueshmërinë e vendimeve.
Ajo që dua të theksoj është që nëse mund ta jap si mesazh për politikën është se zbatimi i vendimeve të GJK është rruga e duhur, e nevojshme dhe e vetme; nuk ka mënyrë tjetër sjelljeje nëse duam të jemi institucione të një shteti ligjor që udhëhiqet nga parimi i demokracisë.
Nuk ka një efekt të pritshëm ligjor sepse nuk është imagjinuar të ndodhë një gjë e tillë. Nuk ka mekanizma që mund të vihen në lëvizje në rast kur nuk zbatohet një vendim i Gjykatës Kushtetuese. Vendimi i GJK është ligj dhe për këtë shkak nuk ka mekanizma”- u shpreh Zaçaj.
Gjykata Kushtetuese rrëzoi Kuvendin për Xhaçkën dhe pranoi padinë e grupit të Alibeajt duke shpallur si antikushtetues vendimin e socialistëve për mos ta çuar në Kushtetuese legjitimitetin e mandatit të deputetes.
Discussion about this post